Nongpoh, Risaw 24: Shi bynta ban ai mynsiem ïaki samla pule ba kin dang kiew shaphrang haki jingpule jong ki ba kham shalor kaba long ruh ka nuksa ïa kiwei pat ki samla pule ba kin minot thop haki jingpule, ka RBYF Pahamlapong bad Pahamsohthri Unit hynnin ka sngi kala pynkup burom ïaki samla pule jong ka shnong kiba wan shakhmat haka eksamin bapher bapher naduh SSLC, HSSLC, Graduate bad Post Graduate haka jingïalang kaba la long ha ïing Dorbar ha Pahamlapong.
Ha katei ka jingpynkup burom naka liang ka seng samla kala aiti ruh da ki momentous sha ki samla pule ha kaba u Bah Liander Nongshli Asst. Secretary ka RBYF sengkmie kum u kongsan, aka jingdonlang, Bawan Marwein Sport Secretary, Denis Syngkli Organising Secretary, Neversad Makdoh, Shining Thangkhiew Vice President Umsning Circle, Tonyroy Lyngdoh President Umsong Circle, ki nongïalam shnong seng kynthei, seng samla bad kiwei kiwei
Haba kren ha katei ka sngi naka liang u Bah Liander Nongshli u la ai ka jingïaroh ïaka RBYF Pahamlapong Pahamsohthri Unit kaba la shim ïaka sienjam ban pynlong kum katei ka jait prokram ban pynkup burom ïaki samla pule da ka jingangnud ban pynshlur bad ban ai mynsiem ïaki khun samla jong ka shnong ba kin dang kiew shaphrang bad ba kin dang bteng ban leh bha haki jingpule ba kham shalor.
U la ong ruh ba ka jingnang jingstad ka long kaba kongsan ha kane ka juk kaba mynta ba kum ki khun samla kim dei ban pynsepei kai ïaka por haki kam ba khlem don kano kano ka jingmyntoi hynrei ban long ki khynnah kiba minot thop haki jingpule bad kumjuh ruh haka sap kaba ki don, namar khlem ka jingnang jingstad ka long kaba khlem nongrim ïaki samla ha kane ka juk kaba mynta.
Naka liang u Bah Liander Nongshli u la kyntu ruh ïaki khun samla ba kin dang trei shitom haki jingpule jong ki ba kham shalor la ki leit ban bteng ha kano kano ka jaka ryngkat ka akor ka burom ban long ki samla kiba tipsngi bad tip briew tip blei khnang ba kin long ki khlur ba tyngshaiñ haka jingim jong ki bad poi shaka thong kumba ki angnud.
