Khliehriat, Risaw 31: Ka ophis jong ka District Sports Officer, East Jaiñtia Hills District ha ryngkat ka jingïatreilang bad ka ophis jong Deputy Commissioner East Jaiñtia Hills District hynnin ka sngi ka la pynlong ïa ka prokram ba kyrpang ha kaba la pynkup burom bad ai khusnam ïa kito ki nongïalehkai sport kynthup ruh ki rang ïalehkai football kiba la wanrah burom ïa ka district kiba la ioh khur ïa ki medal ha ka State Level bad ïa kane ka prokram la pynong ha Conference Hall ha ophis jong u Deputy Commissioner, East Jaintia Hills District ha Khliehriat.
Haba kren kum u kongsan u Deputy Commissioner, East Jaiñtia Hills District, u Shivansh Awasthi, IAS u la ai khublei ïa ka ophis jong ka District Sports Officer, East Jaiñtia Hills District kaba la pynlong ïa kaba kum kane ka prokram pynkupburom ha kajuh ka por u la ai ka jingkhublei kitbok kitrwiang ïa ki rang bad ki thei ïalehkai sport kiba la wanrah nam ïa ka district, u la ong ba na ka liang ka sorkar ruh ka ïaleh katba lah ban kyntiew ïa ki nongïalehkai sport na ka liang ka sorkar ka ïaleh ruh ban shna ïa ki jingtei ne infrastructure kiba bit ba biang ha ki jaka bapher bapher na ka bynta ki nongïalehkai sport ban kyntiew ïa ki sap ki phong ba ki don bad ka sorkar ka la leh ruh ïa ka Talent Identification Programme kaba yn pynlong da ka tnat Directorate of Sports and Youth Affairs bad ka Meghalaya State Olympic Association (MSOA).
Nalor kata u la ong ruh ba na ka liang ki bor synshar disrict ruh kan ïaleh katba lah ban pynbit pynbiang bad ai ki jingkyrshan ïa kito kiba ïalehkai sport.
Ha kane ka jingpynkup burok la ai khusnam ïa ki nongïalehkai sport bad nongïalehkai football kiba la ioh ïa ki medal ha ka State Level da ka pisa.
Ïa katei ka khunsam kaba da ka pisa la ai sha ka kynhun ïalehkai football State Level Inter School bad kito kiba ioh medal ha ki jingïalehkai sport bapher bapher ha ka Athletics Meet 2023-24, kiba hapoh ka 14 snem kyrta (shynrang), ka State Level Subroto Mukherjee Cup Football Tournament 2023, ba hapoh 17 snem kyrta (shynrang) bad ka kynhun kaba hapoh 12 nem kyrta (kynthei) bad la ai ruh ïa ki khusnam bad jingpynkup burom ïa ki coach kiba na East Jaiñtia Hills District .
Kiba la ïa don ryngkat lang ha kane ka prokram ki kynthup ka Additional Deputy Commissioner, East Jaintia Hills District, ka kong J.U. Kharpuri, ka District Sports Officer, East Jaiñtia Hills District, ka kong S. M Rapsang, ki ningkitkam jong ka East Jaintia Hills District Sports Association, ki riew rangbah na shnong Khliehriat, ki coach bad kiwei kiwei.
