Pynkup burom ka NPYF Umroi Block ïa ka samla Laniewkypang Nongrum

Nongpoh, Jylliew 17: Da ka jingsngewsarong kaba khraw halor ka samla Laniewkyrpang Nongrum kaba la ioh rung sha ka thup jong ka top twenty ha ka SSLC examination 2022 ha ka kyrdan kaba phra, ka National People Youth Front, Umroi Block mynta ka sngi ka la pynkup burom ïa kane ka samla halor kate ka nam bad kaburom ba ka la wan rah ïa ka thain bad ka Umroi Constituency hi baroh kawei.
Na ka liang ka NPYF Umroi Block, ka la shim kane ka sienjam ban leh burom ïa katei ka samla ka dei halor ka jingjop jongka ba ka la wan rah ïa ka nam bad ka burom da kaba ka la pas bha ha katei ka SSLC examination ban ioh rung ha ka thup jong ka top twenty ka SSLC examination 2022.
Ïa kane ka jingpynkup burom la pynlong ha ka ingsah jong u MLA barim ka Umroi, u Ma Ngaitlang Dhar ha Umroi Nongrah bad ha kane ka jingpynkup burom nalor ka jingdon lang ka samla Laniewkypang Nongrum bad ki kmie ki kpa jongka, la sakhi lang ruh da ka jingdon lang u President ka NPYF Umroi Block, u Bah Pynhun Rynghang, u Samla Damanbait Bha Lamare, u Samla Pyndap Wahlang, President ka NPYF Ri Bhoi District bad kynthup kiwei ki nongïalam bad ki dkhot ka NPYF na Umroi Block.
Ha kane ka sngi ba la pynkup burom, ka NPYF Umroi Block ka la ai sngewbha ruh da ka Laptop bad ka jingai sngewbha (Memento) sha kane ka samla kum ka dak ka jingsngewnguh bad ka burom ba ka la wan rah ïa ka dong bad ka thain bad khamtam ka nuksa ba bha na ka bynta kiwei ki khun samla ba ka la pas bha ha kane ka exam kaba long shisha ka jingsarong na baroh ki liang.
Haba kren ruh ha kane ka sngi, na ka liang u President ka NPYF Umroi Block, u Samla Pynhun Rynghang, u la ong ba ka daw kaba la pynlong ïa ka NPYF Umroi Block ban leh burom ïa kane ka samla Laniewkyrpang Nongrum, ka dei halor ka nongrim ba ka la wan rah ïa ka nam bad ka burom bad ka jingwan shakhmat eh ha kane ka exam SSLC examination 2022 ka long ruh ym tang ka burom ïa ka ing ka sem bad ka skul, hynrei ka long ruh ka jingai mynsiem ïa kiba bun ki khun samla ka thain Umroi bad ha ka District hi baroh kawei.