Nongpoh, Naitung 26: Kum ka jingai mynsiem ïaki khun samla kiba pass bha haka eksamin SSLC bad HSSLC ba kin dang lah ban lehbha bad minot khambha haki jingpule ba kham shalor bad kumjuh ruh ïa kiwei kiba dang don hapdeng ka jinglynti ban ïakhun ïaki eksamin bapher bapher, ka NPYF, Ri Bhoi District mynta ka sngi kala pynkup burom ïaki spah ngut ki samla kiba la pass bha haka eksamin SSLC bad HSSLC mynta u snem haka jingïalang kaba la long ha Parish Hall ha Nongpoh.
Ha katei ka jingleh burom ïaki samla pule la wan ruh ban sakhi da u Bah Hamletson Dohling State Working President ka NPP kum u kongsan haka jingdonlang ki MLA ka NPP na Ri-Bhoi naduh u Bah Sosthenes Sohtun MLA ka Jirang, Bah Charles Marngar MLA ka Mawhati, Bah Damanbait Lamare MLA ka Umroi, ka kong Rona Khymdeit MDC ka Nongpoh, Bajop Pyngrope, State Working President ka NPYF, u Bah Pyndaplang Wahlang President ka NPYF Ri-Bhoi District bad kiwei kiwei ki heh NPP.
Nalor katei ka jingsam khusnam ïaki samla pule, naka liang ka NPYF kala pynkup burom ruh ïa 2 tylli ki kynhun ïalehkai phutbol ka Ri-Bhoi ki ban leit ïashim bynta sha ka National Level jong ka lympung Subroto Cup ba kynthup ïaka Mawtneng Upper Primary & Secondary School bad ka Nongjri Presbyterian Secondary School bad kumjuh ruh ïa u Samla Johny Nongrum uwei naki nongïakura bad ranglehkai MMA ba paw ka jylla u ba la ioh ban khur shibun ki namjop bad wanrah nam ruh ïaka jylla lyngba ki lympung ïakura bapher bapher.
U Bah Hamletson Dohling haba ai jingkren ha kane ka jingïalang u la ai khublei ïa ki samla pule halor ki jingjop jong ki haki jingpule, bad u la ïaroh ruh ïa ka NPYF Ri-Bhoi kaba la shim khia ban ithuh ïa ki samla kiba don sap.
U la ong ruh ba ka jingsam khusnam ka long tang ka dak bad ka jingai mynsiem hynrei ka long kaba donkam ïaki samla ban don ka thong halade shimet, ban trei shitom bad aiti lut met bad mynsiem khamtam haba kila poi sha ka thong haka jingim ba kin lah pat ban shakri bad ban noh synñiang sha ka imlang ka sahlang bad ka jaitbynriew.
