Khliehriat, naitung 31: Ka NPP Sumer Circle East Jaiñtia Hills District myn ha ka 29 tarik mynta u bnai naitung ka la pynkupburom ïa ka samla Oliva Dkhar, kaba na ka shnong Khahnar, East Jaiñtia Hills District kaba dei kawei na ki samla iakhunkti kaba paw bha kaba la mihkhmat bad khur nam jop ha kiba bun ki rynsan iakhunkti ba hapoh ka jylla, shabar ka jylla bad shabar ka ri ruh.
Ka MLA jong ka Sutnga Saipung ka kong Santa Mary Shylla ha katei ka sngi ka la long kum ka kongsan kaba la pynkupburom ïa ka samla Olivia Dkhar namar ka jinglah jong ka ban ioh ïa ka nam jingjop ha ka 1st position ha ka jingiakhunkti National Arm wrestling & Para Amr wrestling Championships 2025 kaba la wanrah burom ïa ka district bad ïa ka jylla hi baroh kawei
Nalor ka jingpynkupburom ka NPP Sumer Circle ka la theh jingiarap ruh ïa ka samla Olivia Dkhar da ka song pisa kum ka dak ka jingkyrshan lang bad jingai mynsiem ïa ka ba kan nang ïaid shakhmat ha ka jingialehkai iakhunkti, ka MLA ka la ai ruh ki kyntien kitbok kitrwiang ïa ka samla Olivia Dkhar ba kan nang treishitom shuh shuh ha kiwei kiwei ki rynsan iakhun kiban dang wan.
Ha katei ka jingpynkupburom la ïa don ryngkat lang u bah u Amnesty Salahe, u Daohi Manar bad kiwei kiwei ki riew rangbah kiba na ka thaiñ Sumer elaka.
