Jowai, Nailur 24: Mynta ka sngi ki nongpynïaid jong ka Nongtalang College, Nongtalang, West Jaiñtia Hills, ki la ïoh ban pynlong ïa ka sngi pynkup burom ïa ki samla pule ne ka Graduation Day 2025, ïa ki samla jong katei ka College hapoh jong ka Hall jong ka College. Ha kaba u MDC jong ka War Central u ma Jamshaprang Pohtam u la long u Kongsan.
Haba ai jingkren ha kane ka sngi ba kyrpang ki samla ki la la jop ha ki jingpule jong ki u ma Jamshaphrang ula ïaroh shi katdei ïa ka jingtrei shitom jong iwei pa iwei i samla pule jong kane ka College, kumjuh ïa ka jinglah jong ki bor pynïaid kaba dei ka Governing Body (GB) bad ruh ïa ki nonghikai (Lecturers) baroh kynthup ïa u Principal jong ka Nongtalang College.
U MDC ula kynmaw burom ia ki matti jong ki riew khraw pyrkhat jong ka ka shnong ha kato ka por kiba la seng nongrim ïa kane ka College kiba kynthup ïa u Chui Lyngdoh, u John Deng Pohrmen, u Phidelis Pohrmen, bah S. Tariang bad ki nongshong shnong jong ka shnong Nongtalang. Dei lyngba jong ki ba kane ka College ka la long kumba long haduh mynta u la ong.
U Kongsan u la ai khublei ïa baroh ki samla pule ka College kiba la trei shitom ba dei lyngba jong ki ba la lah ban pynlong ïa kane ka sngi ba kyrpang. U la ai ka jingsneng jingkyntu ïa baroh ki samla pule ka Nongtalang College kiba la dei ban mih noh na kane ka College. Ïa kito kiba dang ïohlad ban bteng ia ka jingpule ba shaphrang u dang iai kitbok kit rwiang ba kin nang ïaid shaphrang. Hynrei na bynta kito ki bym ioh lad na ki daw bym lah kiar, hynrei dei ban kynmaw ba ka passs ka la dep bad mynta ka la dei ban peit ia ka present ka jong phi, bad ban mad noh ïa ka pyrthei ba shisha ha ka jingim jong ki, ha kaba ki la hap ban ïeng hala ki jong ki kjat.
U ong ba Mynta ka kynti ban ïoh ïa ka kam ka jam sorkar ka long ka jingiakhun kaba eh bha, namar ka jingduna ki kam, hynrei ki nongïaleh pat da ki hajar. U la pynkynmaw ïa ka jinghiar ka ïoh ka kot ha ka jylla, ka ri bad ha ka pyrthei hi, kumta u buh ka jingkyntu ïa ki samla ban long kiba adkar, kiba shlur ha ki liang baroh.
Kum u Nongmihkhmat paidbah u la ong ruh ba kumba long mynta ka synshar khaddar hapoh ka jylla ka long kaba la bam kruiñ da ka jingbamsap bampong, kumta kum ki samla kiba la nang la sdang dei shimkhia, khnang ban wanrah ka jingmyntoi ïa ka pateng kaba mynta bad ka ban sa wan.
U MDC ula pynkynmaw ruh ba na ka liang ka ïing ka sem jong ki don ban ai sngewbha ïa kane ka khusnam “Babu (L) Puramon Tariang Award for Execellence” kum ka jingpynsah nam pynsah burom ïa ka kyrteng jong u, kum uwei na ki Principal jong kane ka College.
Ïa kane ka khusnam la ai sha ka samla Ioana Mery Sumer, kaba na ka shong Mawlong, kaba poi ha ka kyrdan kaba 9 jong ka Result NEHU Top Ten ha ka BA Khasi.
Ha kane ka sngi la ai khusnam sha baroh ki 40 ngut ki samla pule bad na kine 3 ngut ki dei kiba la poi ha ka kyrdan First Division (First Class).
Ïa ka jingïalang la pynïaid da u Mantre Passah, Lecturer in Pol. Scs, ka jingkren pdiang na u Rymphai Pdang (Commerce Dept).
Kiwei de kiba la ai jingkren ki kynthup ïa u Principal Dr. R.R. Kharkongor, u ma Kat Kassar, General Secretary ka shnong Nongtalang, u ma Hatmin L Giri uba dei u President ka Governing Body bad u bah Medon Thangkhiew.
Kiba la ïadonlang ha kane ka jingïapynkup burom ki kynthup ïa Headman ka Nongtalang u ma Min Lyngdoh, ki dkhot jong ka Governing Body bad ki wei de ki nongshong shnong.
