Shillong, Nailur 18: Ka Meghalaya Football Association ha ka Sngi Balang (18 tarik Nailur, 2024) ka la pynkup burom ïa ka Ri-iohlang Dhar hadien ba ka la shah jied kum ka Assistant Referee na bynta ka FIFA U-17 Women’s World Cup, ka ban sa sdang ha u bnai ban wan.
U Bah Hamletson Dohling-President ka MFA ryngkat bad u General Secretary ka MFA u Sunesh Syiem ki la aiti ïa ka cheque sha ka ka Ri-iohlang Dhar kum ka dak ka jingïaroh bad jingithuh ha ka jingïalang jong ka executive committee ba la pynlong ha ophis jong ka MFA ha JN Stadium, Polo.
U Bah Hamlet u la pynpaw ba ka Ri-iohlang Dhar ka long ka nuksa kaba ai mynsiem bad pynshlur ïa ki samla ka jylla Meghalaya. Na ka liang jong ka Ri-iohlang Dhar, kaba long ka nong India ba ar ban don bynta kum ka referee ha ka World Cup, ka la ai khublei ïa ka MFA kaba la don ryngkat bad kyrshan ha ka jingïaid lynti jong ka tad haduh ba kan da poi sha ka kyrdan international-level kum ka referee ha ki jingïalehkai phutbol.
Ka FIFA U-17 World Cup jong ki kynthei kan long ha Dominican Republic naduh ka 16 tarik u Risaw haduh 3 tarik u Naiwieng.
