Nongpoh, Nailur 17: Kum ka jingsngewsarong ïa uwei na u dkhot nongkitkam hapoh ka kynhun ka shnong ha ka lama ka Mawtneng Sports & Cultural Association, uba la ioh rah ïa ka nam best Coach jong ka Under-17 International Subroto Cup ha Nongbah Delhi, katei ka kynhun jong ki samla ki la pynkup burom ïa u samla Kitborlang Kharlukhi halor ka Nongrim kaba u la wan rah ïa ka nam bad ka burom ïa ka shnong bad kumjuh ruh ïa ka Mawtneng Sports & Cultural Association.
Ïa kane ka jingpyn pynkup burom la pynlong ha ïing Dorbar Hall ka shnong ha ka sngi Saitjain, da ki nongïalam ka Mawtneng Sports & Cultural Association, ha kaba ki la ai da ka khusnam ban pynsah jingkynmaw, kaba u Samla Kitborlang Kharlukhi u la wan rah ïa ka nam ka burom kum uta u Best Coach na katei ka lympung ïalehkai phutbol ba heh ki khynnah skul hapoh ka ri India.
Kum ba phai dien, u samla Kitborlang Kharlukhi, u dei kum u Coach ki khynnah skul ka Mynken Christian Higher Secondary School, Bhoirymbong, kaba dei ka kynhun kaba la ioh ban mihkhmat ïa ka jylla sha ka Under-17 International Subroto Cup ha Nongbah Delhi bad kaba dei ruh ka kynhun kaba la rung sha ka thup phinal ba ka la shah rem noh ha ka kynhun ïalehkai ka Manipur ha ka jingïakhun ban ïa knieh ïa ka nam lahduh katei ka Subroto Cup 2024.
Lyngba katei ka nam bad ka burom kum uwei na u samla ka shnong Mawtneng, uba la lah ban ïalam ïa ka kynhun ka Mynken ban poi sha katei ka thup jong ka phainal bad ruh kaba u la ioh pdiang kum u best coach, ka Mawtneng Sports & Cultural Association ka la shim ïa kane ka bynta ban ai burom bad ban pynkup burom ïa u Samla Kitborlang Kharlukhi kum u Samla na ka shnong Mawtneng.
Ha kane ka sngi, na ka liang ki nongïalam ka Mawtneng Sports & Cultural Association ka la ai mynsiem ïa u samla Kitborlang Kharlukhi ba un dang trei shithrem ban kyntiew ïa ki sap ki phong ki khun samla bad kum u samla um dei ban sngap ïa ka jingshah kren bein ne ïaroh, hynrei u dei ban don kata ka mynsiem ban dang kyntiew ïa ki sap ki phong jong ki khun samla ha ka liang ka jingïalehkai phutbol bad wat kiwei kiwei ki sap jong ki samla kaba long ka jingïatrei lang ban kyntiew ïa ki khun samla hapoh ka jylla.
