Mawkyrwat, K’lyngkot 29, 2026: Ka long kaei kaei kaba pynkmen na ka bynta ka shnong ka thaw khamtam ïa kiba ha ïing ha sem bad kyrpang eh ïa ki kmie kiba kpa kiba la pun la kha bad la ri la sumar, ha kaba uwei u samla na ka shnong Mawkohphet ka shnong kaba nak ham kyndong jong ka South West Khasi Hills District kata u samla Khrawboklang Kharsyiemiong, 29 snem karta uba la ïoh ïa ka kyrdan Doctorate (P.hD) na ka Department jong ka Civil Engineering Indian Institutes of Technology (IITs), Roorkee, Uttarakhand.
Lah ban kdew ba u samla Khrawboklang Kharsyiemiong u dei u khun jong ka Happywilnes Kharsyiemiong bad u Medranlin Ryntathiang na ka shnong Mawkohphet, South West Khasi Hills District kaba jngai kumba 8-kilometre ei ei na Mawkyrwat.
Ha ka jingïaid lynti jong u samla Khrawboklang Kharsyiemiong ha ka jingpule ka long ba naduh ki klas ba khamrit u la pule hapoh Mawkohphet Lower bad Upper Primary School, ïa ka klas 10 ula pule ha ka Jingiaseng Kynthei Rangthong Presbytery Secondary, Mawkyrwat kaba mynshwa ha kaba mynta ka la dei ka Jingiaseng Kynthei Mawkyrwat Presbytery Higher Secondary School, Mawkyrwat, ïa ka klas 12 la pule hapoh ka Seng Khasi Higher Secondary School, Jaiaw, Shillong.
Ïa ki klas kiba kham ha jrong kum ka B.Tech pat ula ïoh lad ban pule ha ki National Institute of Information Technology (NIIT), Meghalaya jong ka Civil Engineering bad ïa ka Master of Technology ne M.Tech ka dei ha ka Geo Technical Engineering na Indian Institutes of Technology (IITs), Silchar, bad ïa ka PhD ne Doctorate pat ula pyndep na ka Indian Institutes of Technology (IITs), Roorkee, Uttarakhand.
U samla Khrawboklang Kharsyiemiong ha ka jingkren jong u, u la pynpaw nyngkong ka jingainguh ïa U Blei ba U la lam lynti watla hapdeng jong ki jingeh kiba bun hynrei da ka jingdon ryngkat jong U ha ki por baroh u la poi sha kane ka thong jong ka jingjop. Ym tangkata, u la pynpaw ruh ka jingkhublei na ka bynta ki kmie ki kpa, kiba ha ïing ha sem, ka shnong ka thaw baroh kawei ba ki la long ha kti ka mon ka kti ka diang ha ki por baroh.
Haba kren ai mynsiem na ka bynta ki khynnah bad ki samla kiba dang don hapdeng jong ki jingpule, u la ong ba kim dei ban don ka jingsheptieng, hynrei ki dei ban buh ïa U Blei ha khmat ha ryngkat ka jingtrei shitom khnang ba haba ki don ha ki jingïaleh U Blei Un kyrshan bor na sha lyndet.
Haba kren ka jingïalang, u bah Renikton Lyngdoh Tongkhar u MLA ka Mawkyrwat Constituency kum u kongsan u la pynpaw ka jingsngewsarong ban tip ba uwei na ki samla na ka shnong Mawkohphet, kaba dei ka shnong kaba don kham ha kyndong jong ka south West Khasi Hills District ka la ïoh ban sei ïa u samla uba la pyndep ïa ka jingpule haduh ka kyrdan Doctorate ne PhD kaba dei na ka Civil Engineering da kaba ong ba kham ñiar eh ban don kiba kum kine ki samla kiba poi ha kum kane ka kyrdan lymda kim don ïa ka mynsiem jong ka jingkut jingmut, mynsiem jong ka jingsngewrit bad trei shitom ryngkat ka jingkohnguh.
Kumta, u bah Renikton ha ka jingkren jong u, u la ai mynsiem ïa u samla Khrawboklang Kharsyiemiong ba lyngba ka jingtrei shitom jong u, ka burom jong kane ka shnong mynta ka la paw bad ai ba kane ka burom kam dei ban kut tang ha ka shi khyllip mat hynrei nang ïai bteng bad long u samla uba ïai minot bad don ka jingthmu ruh ban nang kiew ha kiwei pat ki kyrdan kiba kham hajrong.
Kiwei de kiba la ïadonlang ki long u bah Sarestar Iawphniaw u Myntri Shnong Mawkohphet, u bah Mestindar Kharhari, Secretary Mawkohphet Sports Club, lem bad kiba ha ïing ha sem, ki kmie kha jong u Khrawboklang Kharsyiemiong.
