Pynkup burom ka Laitkor Rngi Dorbar Shnong ïa u Samla Davyson Kharkongor bad u hepbrit Dajied Kyrpang Synjri
Shillong, Naitung 31 : Ka Laitkor Rngi Dorbar Shnong ha ka sngi Thohdieng jong ka taïew ba lah dep ka la pynkup burom ïa u Samla Davyson Kharkongor bad ïa u Hepbrit Dajied Kyrpang Synjri kiba la ïoh ïa ka Takma Rnong ha ka All India Karate Championship Men’s (individual kumite -50kg) kaba la long ha Bilaspur, Chhattisgarh ha ka 15 tarik haduh 16 tarik Naitung 2022 bad ha ka Wako India Citizen, Cadets and Junior Kickboxing Championship, 2022 (26 Kg) Titami Pt.Fighting kaba la long ha Nongbah Kolkata, West Bengal naduh ka 19 tarik haduh 23 tarik Naitung 2022.
Ha katei ka jingpynkup burom la ïadon lang ruh u Rangbah Shnong, General Secretary, ki dkhot ka Committee Shnong, ki Seng Kynthei, Seng Samla Shnong, ki dkhot ka Laitkor Rngi Sports & Cultural Club bad kiba haïing hasem jong kitei ki khynnah.
Na ka liang ka Dorbar Shnong kumba ka ju noh synñiang ïa ki khynnah samla kiba ju mih khmat ïa ka jylla ha ki jingïalehkai bapher papher, ki la noh synñiang ïa 4 ngut ki khynnah kiba dei napoh katei ka shnong mynta u snem 2022 kynthup ïa kitei ki 2 ngut kiba la ïoh ïa ka takma Rnong kiba la ïashimbynta ha kitei ki tournament.
Ka Dorbar Shnong ka la ai ruh ka jingkyrkhu kyrdoh ïa ki ba kin nang trei shitom shuh shuh khnang ba kin lah ban jop ïa ka takma ksiar ha ki tournament ki ban dang wan bad kyntu ïa kiwei pat ki khynnah samla shynrang bad kynthei ba don sap jong ka shnong ban trei shitom kumba kitei ki khynnah ki la trei shitom ryngkat ka jingïatreilang bad ki nongai jinghikai (Coach), ki kmie ki kpa bad kiba haïing hasem.
Ka Dorbar Shnong ka la ai khublei ruh ïa ki coach, ki kmie ki pa bad kiba haïing hasem kiba la trei shitom bad noh synñiang na ka bynta ki khynnah ba kin lah ban poi haduh kane ka kyrdan bad ban ai mynsiem shuh shuh ïa kiwei pat ki khynnah samla jong ka shnong ban ïashim bynta ha ki jingïalehkai sport bapher bapher ba kin lait na ki jing mlien ba sniew bad kaban ïarap ïa ki ha ka koit ka khiah bad khamtam mynta kaba la long ka jingïarap na ka bynta ban ïoh kam ïoh jam bad ruh ïa ka lawei ka jong ki.