Jowai, Nailur : Ka Seng Kur Shylla Khasi Jaiñtia, ha kane ka sngi Saitjaiñ (03.09.2022) ka la pynlong ïa ka jingsam khusnam ne ka jingpynkup burom ïa ki 38 ngut ki samla ba pass bha ha ka Exam jong ka MBOSE bad CBSE bad kumjuh ruh ïa ki lai ngut ki samla ka kur kiba la wan rah burom ha ka liang ka Sports. Ïa kane ka jingpynkup burom la pynlong ha Ummulong Dorbar Hall, West Jaiñtia Hills, ha kaba u ma Wailadmiki Shylla MLA ka Jowai u la long u kongsan.
Ki lai ngut ki samla ka Kur Shylla kiba la wan rah burom ha ka liang ka jingïalehkai Sports ki kynthup ïa u Cheltis Shylla uba la wan ba nyngkong ha ka jingïalehkai Karate, u Kyrshanlang Shylla uba lawan ba nyngkong ha ka 200 Meter Race bad u Chibait Donhi Shylla uba poi haka kyrdan 2nd Runner Up ha ka 4×100 Relay Race, baroh kine ki lai ngut ki la ïoh ban wanrah ïa kane ka nam ha ka 4th Meghalaya Game 2022, ha ka kyrdan Under 17 Boys.
Ïa ka jinglang la pynïaid da ka kong Aiti Shylla, ha kaba la ïoh ruh ïa ki jingkren na u President Sein Kur Shylla ma Pyrkhat Shylla, kumjuh ruh na u ma Laitsing Shylla, ma Meshak Shylla, ka samla Jesmica Shylla, ha ka jingiadon lang ruh ki nongkitkam jong ki Unit bapher bapher ka Seng Kur Sylla Khasi Jaiñtia.
U ma Wailadmiki Shylla haba kren u la ai ka jingïaroh ïa ki nongkit kam ka seng Kur, ba ki la lah ban pynlong ïa kum kane ka jait prokram kaba donkam bha na ka bynta ki samla, kaba long kawei naki kam ban pynshlur shuh shuh ïa ki ha ki kam pule puthi ka jong ki. U la ong ba kam myntoi ïa ka kur lada ki long kiba riewspah lada kim long kiba nang ba stad, ula ong ba ha kine ki sngi ym dei ban pynleit skul ia ki khun tang ban ioh kam sorkar, hynrei lada don ïa ka jingstad halide la lah ban trei ïa shibun kiwei pat ki jait kam.
U la ong ruh ïa ki samla ba kane ka jingpynkup burom ïa ki ka long tang kum ka jingpynkynmaw ïa ki, ba kin nang ïai trei shitom shuh shuh nangne shakmat, na ka bynta ban long ki khlur ki ban wan rah ïa ka nam ka burom ïa ka kur bad ka jait bynriew. Na ka liang u ma Wailad u la ai khublei kyrpang ruh ïa ki kmie ki kpa kiba ai jingnang jingstad ïa ki khun jong ki namar khlem ka jingdon bad jingkyrshan jong ki kane ka prokram kam lah ban long kaba jop.
Ka Samla Jesmica kaba ïoh haduh 92.33% ki mark haba kren ka la pynpaw ïa ka jingsngew nguh ïa U Blei kumjuh ruh ïa ki kmie ki kpa jong ka da kaba ong ba khlem maki kiba la synran lem ïa ka kam lah ban poi sha ka thong.Kiwei de kiba ai jingkren ki kynthup ïa u Banshanlang Shylla President ka Seinkur Shylla East Khasi Hills u Dr. Prince Shylla, u Overload shylla u EC members na South West khasi hills bad u Mawsiang shylla adviser
La pynphuh pynphieng ïa kane ka sngi da ki jingrwai bad jingshad na ki samla Sein Kur War Jaintia, Sein Kur Ialong, Sein Kur Sabah Muswang bad kiwei de.
