Nongpoh, Naitung 14: Ka Khasi Student Union (KSU), Northern Border Area bad Byrnihat Circle kila pdiang bad pynkup burom ïa u samla Jason Lyngdoh u ba bat kum u Sports Secretary ka Khanapara Unit, hadien ba u la wanrah nam bad burom bad ioh ruh ban khur ïaka takma ksiar haka lympung ïakhun MMA kaba la long dang shen ha Noida jong ka Nongbah Delhi.
Ïa katei ka jingpdiang burom bad pynkup burom ïa utei u samla la lamkhmat ruh da u Samla Alex Narleng President ka KSU Northern Border Area, haka jingdon lang u samla Wanphrang Mawthoh President ka Byrnihat Circle, Samla Johny Nongrum Sports Secretary ka KSU NKHD Unit ryngkat ki bahaiing hasem jong utei u samla.
Kum ban shu pynpaw ba utei u samla u la leit ban ïashim bynta ha katei ka lympung ïakhun Mixed Martial Arts kaba la long haka 9 tarik Naitung 2022 haka kyrdan Lightweight Division bad na katei ka lympung u la wanrah ka nam jop ïaka jylla bad khamtam ïaka dong Ri-Bhoi baroh kawei halor ka jingmih ki khlur ïalehkai naka por shaka por.
Katei ka jingpynkup burom jong ka KSU ka long ruh kum ka jingai mynsiem ïa utei u samla u ba dei ruh u dkhot jong ka seng ba un dang lah ban kilan shuh shuh naka bynta kiwei pat ki jingïakhun ba kham heh, ban long ruh ka nuksa kaba bha sha ki para samla baka jinglehkai bad ka jingpyndonkam hok ïaka sap ka long kaba donkam, ban lait ruh naki jingmlien bad ki jingdih buaid kiba pynsniew ïaka met.
Ki nongïalam ka KSU kiba la pdiang burom kila pynpaw ruh ka jingsngewkmen bad kyntu ruh ïakiwei ki para samla ba ki dei ban long ki samla kiba don ka jingkitkhlieh ïaka imlang ka sahlang bad ban kiar naki jingmlien ba sniew.
