Pynkup burom ka KSU ïa ki samla pule da ka “U Woh Tep Kyndait Memorial Achievers Award”
Khliehriat, Naiwieng, 23: Ka Khasi Students’ Union Wapung Circle myn ha ka 22 tarik u bnai naiwieng ka la pynkup burom ïa ki 43 ngut ki samla pule jong ka thaiñ da ka khusnam ‘U Woh Tep Kyndait Memorial Achievers Award’ ïa ka jingpynkup burom bad ki khusnam la sam da u kongsan u bad dei u General secretary KSU Sengkmie u bah Donald .V. Thabah.
Ha katei kajuh hi ka sngi u kongsan u la pynskhem ruh ïa ki nongkitkam ba thymmai jong ka KSU Wapung Circle
Kiba la shah pynkupburom bad ioh ïa ka khusnam ki kynthup ruh u Samla Markos Shylla uba la ioh bat ïa ka kyrdan 1st Position ha ka B.A na ka Department Khasi na Kiang Nangbah Govt College lem bad kiwei kiwei pat ki samla pule kiba na ki kyrdan pule bapher bapher bad na ki shlem pule bapher bapher kata naduh ka kyrdan SSLC, HSSLC, UG, PG, Diploma, PhD.
Kumjuh ruh ka KSU Wapung Circle ka la pynkup burom ruh ïa ka Samla Samjana Phawa kaba la khur ïa ka takma ksiar na ka Lympung Traditional Wrestling &Pankration National Championship ba la pynlong da ka AITWPF Federation Cup 2025 ha Rajasthan.
U samla rangbah, u Donald V Thabah haba kren kum u kongsan u la ai ki kyntien sneng kyntu ïa ki samla pule kiba la ioh khur ïa kane ka khusnam bad jingpynkup burom bad ai ruh ka jingkhublei kitbok kitrwiang ba kin nang kiew shaphrang ha ki jingpule jong ki khnang ban mih shuh shuh ki samla ki ban bat ïa u lakam ha ki tnat treikam bapher bapher bad kin long ki nongialam ka jaitbynriew.
Kiba la ïa don ryngkat ha katei ka prokram pynkup burom ki kynthup ruh u Asst Secretary Sengkmie, u samla Reuben Najiar, u Waheh Shnong Mukhaialong, Waheh Shnong Lumshyrmit bad ki nongialam na ka KSU- CEC bad KSU na ka District, Circle bapher Bapher bad kiwei kiwei de ki riew rangbah bad nong shong Shnong ka thain naduh ki Samla, longkmie, khynnah bad ki hep barit ka thain.
La pyniphuh iphieng ia ka prokram da ki jingrwai ki kynhun Gracious Disciples Voice, ki jingshad na ki samla na ka Shnong Mukhaialong bad ki jingrwai na ka samla Medios Rymbai bad la ioh ruh ia ki kyntien ai khublei na u General secretary samla Shibaitlang Rymbai.