Mawkyrwat, Jylliew 02: Kum ka dak jong ka jingaimynsiem bad pynshlur ïa ki samla pule, ki nongtrei ha ki kam bapher bapher, ka Khasi Students Union’s (KSU) jong ka Pyndensakwang Unit mynta ka sngi ka la pynlong ïa ka prokram jingpynkup burom da ka “Maitshaphrang Awards” ha shnong Pyndensakwang, South West Khasi Hills District.
Lah ban kdew ba ki shiphew (10) ngut ki samla pule kiba la shah pynkup burom ki dei ki samla kiba la leh bha ha ka egsam SSLC bad HSSLC bad kiwei de ki kyrdan pule na ka bynta u snem 2019-2021, ar (2) ngut na ki ki dei nongtrei ha ka tnad ka koit ka khiah (frontline workers) kum ki ASHA, Aganwadi kiba la trei shitom khamtam ha ka por ba ka jingwan u Covid-19 ka jur bha, uwei u nonghikai ba shongthait bad kawei ka longkmie kaba sumar bad ieit ïa ka mei mariang.
U kongsan ha kane ka sngi u dei u bah Pauldep Tongwah, President KSU Mawkyrwat Circle ha ryngkat u bah Sherbok B. Marbaniang bad u bah Skhem Ramsiej kiba long kum ki symbud kongsan.
Ha kane ka sngi, na ka liang ki nongkren ki la ai ïa ki kyntien bad ki symboh kiba shongsbai lyngba ki kyntien sneng kyntu na ka bynta ki khun samla ba ha ki juk ba mynta ki dei ban buh ïa ka thong shakhmat namar kum ka jaidbynriew ba shitroh kim lah leh ei ei ban ïaleh ne ïa nujor bad kiwei ki jaidbynriew kiba don ha Ri India, namar ka jingstad lyngba ki jingpule bapher bapher ha ryngkat ka jingtrei shitom ba ki lah ban ïeng ïaleh ban kynjoh ha kliar u lum ka jingjop.
Namarkata, lyngba ka jingstad jong ki ki lah ban ïada ïa ka Ri bad ka Jaidbynriew hapoh ka jylla Meghalaya bad ka dei ruh ka kamram jong ki khynnah skul bad ki samla pule ki ban btien lynti ban ïalam sha ka lawei ba phyrnai. Ki la ong ruh ba ka lada ki kwah ban kiew sha ki kyrdan kiba kham shalor kaba donkam ka long ka jingsngewrit, ka jinglen-lade bad ka jingtreishitom ryngkat ka akor ka burom.
Kiwei pat kiba ïadonlang ki long u bah Donborlang Nongsiej, Secratary Shnong Pyndensakwang, ki dkhot ka KSU Mawkyrwat Circle lem bad kiwei kiwei de ba kynthup ïa ki nonghikai, ki khynnah skul bad ki paidbah jong ka shnong.
Ïa ka jingïalang la pynlong ha ka Dorbar Hall Pyndensakwang South West Khasi Hills District ba la pynïaid da u bah Johnpetar Kharjahrin, President ka KSU Pyndensakwang Unit.
