Nongpoh, Iaiong 06: Hadien kumba 7 ngut ki rang bad thei ïalehkai kick-boxing ka jylla ki la lah ban wanrah ïa ka nam bad ka burom da kaba khur haduh 7 tylli ki takma bapher bapher na ka lympung ïalehkai Kick Boxing Championship ba la pyn long da ka Hades MMA K Pro 3.0 kaba la long ha jylla Goa ha ka 1 tarik bad 2 tarik Ïaiong, ka KSU North Khasi Hills District mynta ka sngi kala pdiang bad pynkup burom ïa kitei ki rang bad thei ïalehkai ha Byrnihat.
Ïa ka kynhun ïalehkai Kickboxing jong ka jylla Meghalaya la lamkhmat da ka kynhun Legendary Warrior Combat team lem bad ka Byrnihat Boxing MMA Club ba la lamkhmat ruh da u rangialehkai ba paw ka jylla u Samla Johnny Nongrum Head Coach, u Mordekai Simon Kharpuri kum u coach ryngkat ka jingïadon lang ki member u Bah Pyrkhat Sohiong bad u Badonbor Sylliang.
Ki rang bad thei ïalehkai kiba lah ban khur ïa ki takma na katei ka lympung ïalehkai Kickboxing ki kynthup ia u samla Johnny Nongrum u ba la khur ïa ka takma ksiar, u Wanlamkupar Thabah, u Futurecy Sohiong bad Banshem Pathaw kiba la ioh khur ia ka takma Rupa, katba ka Ibanesha Dkar, u Kyrshanlang Dkhar bad ka Da I Hun Shisha Mawlong ki la ioh khur ïa ka takma rnong.
Kaba kham ai mynsiem ïa ka jylla Meghalaya, ka long ba napdeng ki 18 tylli ki kynhun ïalehkai kiba la leit ban shimbynta na 16 tylli ki jylla, ka jylla Meghalaya ka la wan ha ka kyrdan ba-lai na baroh ki kynhun ha ka jingkhur takma.
Na ka liang u Samla Johnny Nongrum u ba la ioh khur ïaka takma ksiar na katei ka jingïakhun, u ba dei ruh u Sports Secretary jong ka KSU NKHD Unit u la ong ” Nga ai Khublei ïa ka Seng Khasi Students Union kaba la pdiang Sngewbha ïa ngi ryngkat kine ki jingpynkup burom, nga ai nguh ïa u Blei u ba la btin lynti ïa ngi naduh ba ngi mih nangne haduh ba ngin wan phai ryngkat ka jingjop, nga kyrpad sha ki para Samla ban ïa shim khia haba ki don sap ban ïalehkai sports ym ban Shu shim ïa ka tang ka jinglehkai byrngia hynrei ban shimkhia ha ki kam ialehkai bad ngi khmih lynti ban iohi Shibun ki samla ki ban wanrah ka Burom ia ka bri hynniewtrep bad ia ka Jylla hi baroh kawei.
Jowai: Ka Khasi Student Union West Jaiñtia Hills District Unit mynta ka sngi kala pdiang burom ïa ka Ineshabahun Dkhar kawei na ki rangïalehkai ha ka lympung Kickboxing Championship jong ka ‘HADES K-PRO 3.0’ da kaba ïoh khur ïa ka takma Rnong ha katei ka ryngsan kaba dang shu dep pynlong ha nongbah Goa naduh ka 1 tarik bad 2 tarik u Ïaïong 2022.
La ïathuh ba ka samla Ineshabahun Dkhar ka dei kawei na ki rangïalehkai ba nyngkong jong ka District kaba la jop haka kyrdan National.
Ka Inesha Bahun Dkhar ka dei ka khun ba lai napdeng ki San (5) ngut shi para (lai ngut ki kynthei bad ar ngut ki shynrang) jong ka kong Maialang Dkhar na ka shnong Trangblang West Jaiñtia Hills bad kane ka samla ka dang bteng ryngkat ka jingpule mynta ha ka kyrdan MA na IGNOU.
Kum ban shu phai khyndiat ba ka samla Ineshabahun Dkhar kala ïoh khur ïa ka takma ksiar (Gold medal) ha ka National Level in Kick boxing kaba la long ha Punjab bad sa kawei ka takma ksiar ha ka National level in Mauythai kaba la long ha Guwahati.
Ka la ïoh khur ruh ïa ka 2 tylli ki takma Rupa ha ka National level in kick boxing ha Guwahati bad Goa.
Kumjuh ka takma Rnong ha ka National Level in Muaythai ha Lampak Manipur bad ha kane ka National level in Hades K-Pro 3.0 KickBoxing Pro ha Chowgule College, Vidya Nagar Margoan, Goa.
Baroh ki takma kiba ka samla Ineshabahun Dkhar ka la ïoh khur ki don haduh 6 tylli (2 tylli ki Gold medal, 2 tylli ki Silver medal bad 2 tylli ki bronze)
Halor kane ka seng kala pdiang burom ïa katei ka samla ha ryngkat kiba ha ïing hasem jong ka, da kaba la pynlong ïa ka jingïalang ba lyngkat ha phyllaw jong ka Highwinds kaba don hajan ka pung Thadlaskeiñ, kum ka dak ban ai mynsiem ïa katei ka samla ba kan nanglah ban kiew shaphrang ha katei ka kam ïalehkai Kickboxing.
Ïa ka jingïalang la pynïaid da u samla Pharki Papeng Finance Secretary ka seng, la ïoh ruh ka jingkren na u samla Michel P. Mukhim Sports Secretary bad kumjuh ba u Vice President ka seng u samla Chanbor War kiba la ai ka jingkitbok kit rwiang ïa katei samla ïalehkai Kickboxing ba kan dang kiew sha khmat ha katei ka kam ïalehkai, kum ka lad ban ai mynsiem lem ïa kiwei de ki para samla jong ka jaitbynriew.
Na ka liang ka samla Ineshabahun Dkhar habe kren sha ki lad pathai khubor kala ong ba kane ka jinglah jong ka ka dei lyngba ka jingdon ryngkat jong U Blei bad ka jingkyrshan lang jong kiba haïing ka sem, ki nonghikai (Coach) kiba la ai mynsien naduh ba sdang jong kane ka lyngpung haduh ba kut jong ka.
Ka la kyntu ïa kiwei de ki para samla ba kin don ka mynsiem trei shitom ha kino kino ki kam ba la angnud, ka ong kum ki samla ki dei ban don ‘ka mynsiem jingsngew rit, ka jingkohnguh bad ka jingmihnot ha ka jingim’.
