Shillong, Jylliew 6: Ha ka 6 Tarik u Jymmang 2022 ka KSU North Khasi Hills District Unit bad KSU South West Khasi Hills District Unit ka la pdiang burom ïa arngut ki samla khasi kiba la mihkhmat bad wanrah jingjop ha ka Indo-Nepal International Youth Futsal Cup 2022 kaba la long ha Pokhara, Nepal. Ki ar ngut ki samla ba mihkhmat ïa ka Ri India ki kynthup ïa ka samla Liza Muktieh na ka shnong Lumdaitkhla, Ri Bhoi District bad Fragrancy Riwan na ka shnong Lawbah, East Khasi Hills District.
La pynlong ïa ka jingïalang ba lyngkot ha kaba la ai jingkren da u samla Lambok Rymbai-Vice President KSU North Khasi Hills District Unit bad Samborlang Shabong (Asst. GS KSU SWKHD).
U samla Lambok Rymbai u la pynpaw ïa ka jingsngew kmen bad jingsngew sarong ïa kine ki samla ba la wanrah burom ïa ka jaitbynriew. “Kiba bun ki samla khasi ba donsap ha ki jingïalehkai bapher bapher pynban ki ïakynduh jingeh na ki daw ka jingbym phai khmat ka sorkar ban kyntiew lem ha kane ka bynta bad ka jingbymdon ïa ka Sports policy kiba paka. Namarkata ngi kyntu ïa ka sorkar ban pynkloi noh ha ka ban pynwandur bad pyntreikam noh ïa sports policy ba biang khnang ba kan long ka jingmyntoi ïa ki samla.”
La ai jingkren lyngkot ruh da U Samla Samborlang Shabong ha kaba u la ong ba ki ka KSU ka sngew ban ai ka jingpyrto ïa ki samla ba ïoh mihkhmat ïa ka Ri India namar ka Jaidbynriew kam duna ha baroh ki liang hynrei ka dang donkam shuh shuh ïa ki Samla ka Jaidbynriew ba kin pynleit jingmut bad pyndonkam hok ïa ka sap ba ki don khnang ba kin lah ban ïai kyntiew shuh ïa ka Jaidbynriew, ha kane ka sngi la ïa jingïadonlang u Samla Johny Nongrum (Sports Secretary KSU NKHD), samla Steven Kharkrang Asst GS KSU NKHD unit ki dkhot napoh KSU Lawbah Circle bad KSU Umïam Circle.
