Pynkup burom ka KSU ïa 36 ngut ki samla pule bad 4 ngut ki nongkitkam ba la shongthait

Mawkyrwat, ‘Nailur, 25: Ka Khasi Student’s Union (KSU) jong ka Rangthong Unit ha ka sngi 24/09/2022 lyngba ka 9th Maitshaphaphrang Academic Award ka la ïoh ban ai khusnam sha ki 36 ngut ki samla pule na bynta ka jingleh bha jong ki ïa ki eksam bapher bapher naduh ka SSLC, HSSLC, Graduate, Post Graduate bad kiwei ha kaba ïa ka jingïalang la pynlong hapoh ka Community Hall jong ka Shnong Rangthong.
Ha kane kajuh ka sngi ka KSU Rangthong Unit ka lah ïoh ruh ban kup burom kyrpang ruh na ka bynta ki saw (4) ngut ki samla rangbah ba la shong thait na ka seng kata ïa u samla Armstrong Shangdiar, Finance Secretary barim bad u General Secretary barim kane ka Unit uba long ruh u founder member jong ka KSU Rangthong Unit, ïa u samla Iengskhem Syiemlieh, Education Secretary barim ka KSU Rangthong Unit, ïa u samla Pynskhemborlang Shang-diar, President barim ka KSU Rangthong Unit bad ïa u samla Joster Langte uba dei u dkhot.
Haba kren ha kane ka sngi u bah Blosdingwell Wanniang, President barim ka KSU South West Khasi Hills District kum u kongsan u la kyntu ïa ki samla pule ba ki dei ban nang ïai trei shitom ha ki jingpule khnang ba kan long ka jingkyrmen ym tang ïa ka shnong ka thaw hynrei ïa ka Ri bad ka Jaitbynriew hi baroh kawei.
Na ka liang u bah Forwardman Nongrem, President KSU South West Khasi Hills District haba kren kum u Symbud Kongsan u la ong ba, “Haba phai sha ki jingeh ïa ka Jaitbynriew bad ka jingshah ñion ka Jaitbynriew ha ka tnad pulit bad kiwei kiwei ki tnad treikam jong ka sorkar, ka la dei ka por ba ngin ong ba ngin leh hi noh bad kata ka long ban trei shitom ban pule bha bad ban knieh hi noh ïa u lakam ha ki kyrdan kiba heh bapher bapher ba la ju bat da ki bym dei khasi baroh shikatta”.
U la bynrap ruh da kaba ong ba kawei ka jingeh ba ka Jaitbynriew ka mad ka dei ka jingduh noh ïa ka mynsiem jong ka jingsngewthuh lem ïa ki jingeh bad ka jingkitkhlieh ha la ïing la sem, “Ki kmie ki kpa bunsien khamtam ha kane ka juk ki ai katba ki pan ki khun khlem da pynsngewthuh ha ki khun ïa ki jingeh bad ban ai lem ka jingsngewkitkhlieh ïa ki jingeh jong ki halor kata ka bynta”.
U la kyntu namarkata, ba ki samla pule ki dei ban sngewthuh bad pyrkhat ba kam dei kaba suk ïa ki kmie ki kpa ban pynbiang ïa ki jingdonkam jong ki bad lyngba kata ka jingsngewthuh bad ka jingkitkhlieh kan rah ïa ki samla pule ba kin nang ïai trei shitom bad nang ïai jop ha ka jingim jong ki.
U la ong ruh ba kum ki dkkhot ka seng ki dei ban sngewthuh kham bha ia ka jingkordor jong ka pule puthi da kaba pynshlur ia ki samla pule ym tang da ki jingpynkup burom hynrei wat ban pynlong ia ki mat iathir iatai kumno ban sngethuh ia ka jingeh kaba ki samla ki iakynduh la ka long ha ka pule puthi, ka iohkam ka iohjam bad ha kiwei kiwei de ki lad ba ki samla ki phaikhmat.
Ha kane ka lympung la ïa don ryngkat ruh ki nongïalam naduh u Pauldeep Tongwah, President ka KSU Mawkyrwat Circle, u bah Kyntiewnam Syiemlieh, Secretary Shnong Rangthong, ka kong A. Allya, Principal Rangthong Christian Higher Secondary School, nongïalam ka seng, ki longkmie longkpa, ki khynnah skul bad kiwei de ki ‘riew rangbah jong ka shnong Rangthong.
Kane ka long ka kyrwoh na u samla Jingkyrmen Nongrem, Publicity Secretary, KSU Rangthong Unit.