Nongpoh, Jymmang 28: Shibynta ban pynshlur bad ai mynsiem ïaki samla pule ba pass bha haki eksamin bapher bapher ha Ri-Bhoi naduh SSLC haduh ka kyrdan PhD ka Khasi Student Union, North Khasi Hills District Unit mynta ka sngi kala shim ïaka sienjam ban pynkup burom ïa kumba 104 ngut ki samla pule ba pass bha jong u snem 2020-21 da ka khusnam Fr. Sylvanus Sngi Lyngdoh Maitshaphrang Academic Award 2020-21 kaba dei ruh ka lyngkhuh sngi iap kaba 6 jong u Fr Sylvanus Sngi Lyngdoh uwei naki riew khraw ka jaidbynriew ban kynmaw burom halor u synñiang u bynhei haka liang ka thoh ka tar bad ka jingshakri ïaka jaidbynriew.
La sakhi ruh ha katei ka sngi da ka jingdonlang u Bah Lambokstarwell Marngar President ba rang ka KSU sengkmie kum u kongsan bad ka kong Paido lyne L Nonglait District School Education Officer ka Ri-Bhoi District kum ka symbud kongsan, Dr. Fabian Lyngdoh pyrsa jong u Fr Sngi Lyngdoh ba dei ruh u Professor jong ka Martin Luther Christian University, Samla Raymond Kharjana Education Secretary ka sengkmie, u Samla Ferdinald Kharkamni President KSU North Khasi Hills District bad kiwei kiwei ki nongïalam naka sengkmie bad North Khasi Hills, ha ryngkat ki samla pule kiba la ioh bana pdiang ïaka khusnam ryngkat ka jingsynran lang jong ki kmie ki kpa bad ki bahaiing ha sem.
Ka jingangnud jong ka seng ban shim ïaka sienjam ban pynkup burom ïaki samla pule kum ka jingai mynsiem bad pynshlur ïaki ba kin nang kiew shaphrang haki jingpule, ba kin dang lehbha shuh shuh ïaki jingpule ba kham shalor bad ruh ba kin long ki samla kiba seisoh bad poi shaka thong kumba ki angnud, kumba ka KSU ka don ruh ka thong ban sei ïaki samla ban leit ïakhun ïaki Civil Service Exam haka ri.
Haba kren ha katei ka sngi naka liang u Bah Lambokstarwell Marngar President ba rangbah ka seng u la ai ka jingïaroh ïaka KSU North Khasi Hills District kaba la shim ïaka sienjam ban pynkup burom ïaki samla pule bad ban kynmaw burom ruh ïaka lyngkhuh sngi iap jong u Fr. Sylvanus Sngi Lyngdoh uwei naki khrawpyrkhat u ba la noh synñiang shibun sha ka imlang ka sahlang kaba dei ruh ka sienjam ba kum ka seng ka don ka jingangnud ban kyntiew ïaka pule ka pule ban pynmih bad sei ruh ïaki khraw pyrkhat kiba lah ban ïalam ïaka ri bad ka jaitbynriew bad ngim dei shuh ban shaniah than tang haki nongwei ban bat ïa u lakam ka synshar khaddar.
U la ong ruh ba dang ha kine ki sngi bala dep kala pynlong ruh ka jingjied ïaki samla ban leit shah pyntbit naka bynta ban ïakhun ïaki eksamin Civil Service haka ri India bad ka daw bala pynlong ïaka seng ban shim ïaka sienjam ka long ba 50 tylli ki snem kila leit noh hynrei ka jylla jong ngi ka dang duna eh ka jingpynmih ïaki IAS, IPS, IFS bad kiwei kiwei.
Naka liang ka kong Paidolyne L Nonglait kum ka ophisar ba peit ïaki skul ha Ri-Bhoi District kala ai ka jingïaroh ïaka seng KSU kaba ju pynshlur ïaki samla pule ban mih shakhmat bad ai mynsiem ruh ïaki haka liang ka pule ka puthi nalor ka kam shakri ïaka ri bad ka jaitbynriew bad lehse lyngba katei ka jingaikhusnam jong ka KSU kan long ruh ki phliah ding haki samla pule ba kin dang minot shitrhem khnang ba kin poi shaki kyndan jong ka nam ryngkat ka jingsnng jingkyntu bad ai mynsiem ïaki ba kin dang minot thop haki jingpule khlem da pynsepei kai ïaka por bad ka jingkyrmen haka jingim.
