Nongpoh, Naiwieng 13: Ki nongïalam shnong naka thaiñ Umdap hapoh ka lama ka Joint Action Committee, Umdap Area Development Organisation mynta ka sngi kila pynkup burom ïaka kong Bindas Syiem kaba dei ka longkmie marwei kaba la leit ban shah thngan ha phyllaw ka Secretariat ban dawa naka sorkar ba ka dei ban shna bad pynbha noh mardor ïa ka surok Nongpoh, Umden shaduh Sonapur kaba ki paidbah kila mad jingeh namar ka jingjot rathai jong u surok.
Ïa katei ka jingpynkup burom ïa ka Kong Bindas Syiem, la pynlong ha ïing Dorbar Pahammawleiñ 20mer, hapoh ka jingïalam u Bah Lawrence Nongrum, Chairman ka JAC Umdap Area Development Organisation, u Bah C.B Syiem, CEM barim, u Bah S.W Malai, President ka Nongpoh Block Congress Committee, u Bah Bandari Ryntathiang, President ka CORP, bad kiwei kiwei ki riew rangbah bad ki paidbah nongshong shnong na katei ka thaiñ.
Kum ka kynhun jong ka JAC Umdap Area Development organisation bad ki riew rangbah ha katei ka sngi kila pynpaw ba ka daw hi ka jingpynkup burom jong ki ïaka kam kong Bindass Syiem ka dei namar ka jingurlong jong ka surok kaba la mang na Umden sha Lum Nongrim Byrnihat lyngba ka skhim PMGSY bad khmih lynti ruh shen ba ka sorkar kan sa mang ïaka bynta kaba na Nongpoh sha Umden kaba ki paidbah kila ap khmih lynti bad donkam palat.
Na ka liang ki riew rangbah kiba la ai jingkren ha katei ka sngi kila ai ka jingïaroh ïaka Kong Bindas Syiem kaba long kum kawei naki riew shlur kaba la shim ïaka bynta ban leit ban shah thngan marwei sha nongbah Shillong naka bynta ban dawa naka sorkar ba dei ban siang rong mardor ïaka surok Nongpoh, Umden Sonapur bad kadei ka jingshah thngan jong katei ka longkmie kala urlong namar ka sorkar mynta kala mang pisa ban sdang shuwa ban siang rong ïaka surok na Umden sha Lum Nongrim Byrnihat ban pynsuk ïaka leit ka wan ki paidbah.
