Pynkup burom ka FKJGP Lyngkhom Unit ïa 5 ngut ki samla pule bad noh jingïarap ruh ïa ki lai tylli ki longïing
Mawkyrwat, Ïaïong 19: Ka Federation of Khasi Jaiñtia & Garo People’s (FKJGP) jong ka Lyngkhom Unit ha ka jingïaid lynti kaba dang tang 6 bnai duna ka lah ban ai khusnam ne Award ïa ki khynnah pule kiba pass bha ha ka egsam SSLC/HSSLC/NEHU bad ha kajuh ka por ban ai jingïarap ïa ki lai tylli ki longïing ba duk ha ka shnong Lyngkhom.
Haba kren ha ka jingïalang, u bah Eldie N. Lyngdoh, Vice-President jong ka FKJGP Central Body kum u kongsan, u la pynpaw ka jingaikhublei na ka bynta ki khynnah samla kiba ïoh pdiang ïa kane ka khusnam kaba long kawei na ki dak jong ka jingai mynsiem bad pynshlur ïa ki ba kin nang ïaleh bad trei shitom shuh shuh ha ki sngi ki ban dang wan, namar ki im ha kine ki sngi jong ka jingïakop ha kaba ki briew kiba la nang la stad ki la nang bun.
U la pynkynmaw ruh ba haba phai ha ka wad kam wad jam lei ka la long kaba eh ha kine ki sngi lymda ki khynnah pule kin poi ha ki kyrdan kiba ha khmat eh. “Ka jingïoh jong ki ïa ka 70% bad 80% kam pat da diang, hynrei ki dei ban nang kham pynjanai shuh shuh ban poi haduh 100% ruh”, ong u bah Eldie.
U la ai jingïaroh ruh ïa ka FKJGP jong ka Lyngkhom Unit kaba la pyni lynti da kaba tbeh ïa u kyndok jingpruid ai jingshai ha ka ban ïalam na ka bynta ki khunsamla ha ka lynti ba dei ryngkat ka jingïatreilang bad ka Dorbar Shnong. Namarkata, ka long kaba donkam ba kum ki paidbah nongshong shnong kin ai ka jingïatreilang bad ki sengbhalang na ka bynta ban kyntiew ïa ka bha ka miat ha ki shnong ki thaw, ka imlang ka sahlang bad kumjuh ha ka ri bad ka jaidbynriew baroh kawei.
Ha katei ka program la ïoh ban sam ïa ki khusnam sha ki 5 ngut ki khynnah samla ba pass bha kiba kot sha ka 70% bad 80% kumjuh ban noh jingïarap tiar bad pisa sha ki lai tylli ki longïing baduk.
La pynïaid ïa ka programme da u samla Ri-akor Youthborne, President ka FKJGP Lyngkhom Unit bad ka jingkren ai khublei na u samla Seidondor Reenbon, General Secretary ka FKJGP Lyngkhom Unit.