Pynkup burom ka FKJGP ïa u samla Albin Lyngdoh uba ïoh Top-20 ha ka SSLC 2023
Mawkyrwat, Jylliew, 14: Ka Federation of Khasi Jaiñtia Garo People’s (FKJGP) Mawthadraishan Circle ka la ioh ban Pynkup Burom ia uwei u khynnah jong ka St. Joseph Higher Secondary School, Nongkasen, Eastern West Khasi Hills District kata ia u Albin Lyngdoh Marshillong u ba la ioh ia ka Top 20 haka SSLC Result jong mynta u Snem 2023.
Namarkata, na ka liang ka seng ha ka jingïalam u bah Firstborn John Marngar, President jong ka Federation of Khasi Jaiñtia Garo People’s (FKJGP) Mawthadraishan Circle ha ryngkat u samla Silenstar Kharbani, General Secretary jong ka Federation of Khasi Jaiñtia Garo People’s (FKJGP) Mawthadraishan Circle lem bad katto katne ki dkhot ki la leit ha kane ka jaka pule ban ai mynsiem ryngkat ka jingpynkup burom kum ka dak ban ai mynsiem shuh shuh ïa u samla Albin Lyngdoh ba un dang dang ïai leh bha bad trei shitom shuh ba u lah ruh ban poi ha ka Top-10 khamtam ha ka klas XII.
Ha kajuh ka por ka Seng lyngba u President bad General Secretary ki la kyntu ruh ïa baroh ki khynnah jong kane ka St. Joseph Higher Secondary School, Nongkasen, Eastern West Khasi Hills District ba kin bud ïa ka nuksa jong u samla Albin Lyngdoh khnang ba ym tang ma u hynrei ba kiwei ruh kin ïai bteng ban wan rah ïa ka nam bad ka burom ïa ka skul bad ïa ka dong ka thaiñ kumjuh ruh ïa ka jaitbynriew hi baroh kawei.
Ha kane ka sngi, na ka liang ka seng ka la ïoh ruh ban pynkup burom ïa ka St. Joseph Higher Secondary School, Nongkasen ba ka la ïoh ba wanrah ïa Top-20 ha ka SSLC 2023 bad kaba dei ruh kawei ba ki skul jong ka dong ka thaiñ Mawthadrai-shan bad kaba dei ruh ka skul ba nyngkong eh ban wanrah ïa ka nam bad ka burom napdeng ki skul kiba don hapoh ka Mawthadraishan.
Namarkata, ka seng ka sngewban kyntu bad ai mynsiem ruh ïa kiwei ki khynnah bad kiwei ki skul kiba don hapoh jong ka Mawthadraishan ba kin ïai trei shitom bad ban wanrah ka nam bad ka burom lyngba ka jingtrei shitom bad ka jingminot ka jong ki.
Nalor ka jingaisngewbha ïa u Albin Lyngdoh, ka seng ka la ai sngewbha ruh ïa u Rev. Father John Albert Ryntathiang, Principal jong ka St. Joseph Higher Secondary School, Nongkasen kum ka dak ban pynkup burom bad ai mynsiem shuh shuh ïa ki khnang ba na ka liang jong skul kan dang lah ban dang ïai trei shitom bad pynmih shuh shuh ki khynnah skul kiba poi sha ki kyrdan kiba kham shakhmat ha ki snem ki ban dang wan.
Ha kaba ai jingkren na ka liang jong u bah Firstborn John Marngar, President jong ka Federation of Khasi Jaiñtia Garo People’s (FKJGP) Mawthadraishan Circle u la ong ba “Wei la kut ka jingmut, ka mynsiem kam lah ban shongkhop ba ka jinghun ka mynsiem ka long ka jingjop”, kine ki ktien phira kiba na ka liang u President u la kren ha kane ka por kum shibynta bad ai mynsiem ïa baroh ki khynnah ki pule ha kane ka skul.