Mawkyrwat, ‘Nailar, 28: Ka Federation of Khasi Jaiñtia & Garo People (FKJGP), South West Khasi Hills mynta ka sngi ki la pynkup burom ïa u President ba la shongthait na ka kam kum u President FKJGP, South West Khasi Hills District, bah Ailadstar Nongrem bad ha kajuh ka por ki la ïoh ruh ban pyntiansmai ïa ki nongkitkam ba thymmai jong ka FKJGP jong ka South West Khasi Hills District ha kaba u bah Dondi Cliff Khongsit, President Rangbah u la long u kongsan bad shim ruh ïa bynta ban pyntiansmai ïa ki nongkitkam ba thymmai jong ka FKJGP South West Khasi Hills District hapoh jong ka Hall Maharam Government Higher Secondary School, Mawkyrwat.
Kane ka jingpynthymmai ïa ki nongkitkam jong ka FKJGP South West Khasi Hills District ka dei na ka bynta ka samoi treikam jong u snem 2022 – 2025 ha kaba la ïoh President da u bah Kenesjune Nonglait, Secretary u bah Belse Kharbani ha ryngkat ki dkhot kiba hakhmat jong ka seng kiba la shah pyntiansmai ha kane ka sngi.
Ha kane ka sngi kyrpang jong ka FKJGP ka la long shisha kaba i shongkun lyngba da ka jingïa donlang ki ‘riew rangbah jong ka shnong Mawkyrwat, ki nongïalam ba hakhmat ka KSU, South West Khasi Hills District, u bah Elde Lyngdoh, General Secretary ka FKJGP Central Body bad kiwei de ki dkhot.
La ioh ruh ban pynshit pynshngaiñ shuh shuh ïa kane ka jingïalang da ka jingpynbyrngia da ki drama lyngkot na ka Kynhun Biria U Maram (KBUM) bad ka jingrwai kyrpang na u bah Amnis Shangdiar.
Ha kajuh hi ka sngi, na ka liang ka FKJGP ka la ïoh ban pynkup burom ïa u bah Lamkupar Snaitang u ba la leh i synei na ka bynta ka imlang sahlang bad uba la pynïarap ban sei ïa ka met jong u samla uba la ngap jyllop ha wah Umngi ha kine ki khyndiat sngi.
Haba kut jong ka jingïalang, u bah Ailadstar Nongrem u la ïoh ruh ban ot ïa u cake kum ka dak ka jingieh noh ïa ka kam kum u President jong ka Federation of Khasi Jaiñtia & Garo People (FKJGP), South West Khasi Hills District.
Kiwei pat ki nongkitkam jong ka FKJGP South West Khasi Hills District ki long Senior Vice President u Ferdinand Iawphniaw, Vice President u Rockfeller Pariat, Joint Secretary u Tensing Lyngdoh Nonglait, Assistant Secretary u Combarstar Jyrwa, Organising Secretary u Hamran Ramsiej, Chief Organising Secretary u Welborn Marweiñ, Environment Secretary u Probert Wahlang, Agriculture Secretary u Teinam Nongtnger, Sports Secretary u Tenbarsing Lyngkhoi, Education Secretary u Shainstar Thongni bad kynthup ïa ki 11 ngut ki dkhot kiba la pyniasoh bad ka seng na ka bynta ban iakit iabah ia ka lyngkor shakri lyngba kane ka sengbhalang na ka bynta ban shakri ia ka imlang ka sahlang.
