Mairang, Ïaiong 27: Kum shibynta jong ka jingrakhe ïa ka jingdap 50 snem jong ka jylla Meghalaya, la ïoh ban pynkup burom ïa ar ngut ki nongïalam jong ka jingïakhih ban pynïoh Hill State ka jylla, kata, u Bah Hopingstone Lyngdoh (bam kwai ha ïing u Blei) bad u Bah Fuller Lyngdoh Mawnai (bam kwai ha ïing u Blei). Kiwei pat kiba la shah pynkup burom ki dei ki 16 ngut ki volunteer jong ka jingïakhih Hill State.
Ïa ka jingpynkup burom la leh da ki bor pynïaid District jong ka Eastern West Khasi Hills District ha ka prokram ba la pynlong ha Madan Mot Tirot Mairang Mission Mairang mynta ka sngi, ha kaba u Lamphang ka Ïing dorbar Thaw Aiñ ka jylla u Bah Metbah Lyngdoh, u la long u kongsan ha ka jingdon ryngkat u myntri ka tnat Water Resources ka jylla u Bah Brolding Nongsiej u ba la wan kum u symbud kongsan.
Kiwei pat kiba la wan sha kane ka prokram ki kynthup ïa u MDC ka Mairang- Nongkhlaw u Bah Batskhem Ryntathiang, u Deputy Commissioner ka Eastern West Khasi Hills District u Bah W.Nongsiej, u Superintendent of Police ka District u bah M.B Syiem, u Syiem ka Hima Nongkhlaw u Pa’iem P.M Syiemlieh, u Syiem ka Hima Myrïaw u Pa’iem K. Syiem, u Syiem ka Hima Mawïang u Pai’em N. Syiem, ki nongïalam shnong ka thaiñ, ki nongrep, ki dkhot jong ki seng treilang (SHG), ki nonghikai bad ki khynnah pule.
Ha ka jingkren jong u kum u kongsan, u lamphang ka Ïing Dorbar Thaw Aiñ ka jylla, u Bah Metbah Lyngdoh u la kren shaphang ka jingïohi jngai jong ki nongïalam jong ka jingïakhih Hill State ka jylla, kiba la trei doh ïap ban pynthikna ba ngi ïoh la ka jong ka jylla kaba ïahap bad ki dustur bad rukom jong ngi ki riew lum.
U la ong ba kane ka jingrakhe ka pynïoh ha ki nongshong shnong ïa ka kabu ban phaidien sha ka mynnor jong ka jylla, ka jingïaid lynti jong ka ha ka roi ka par ha kiba bun ki liang lyngba ki snem bad phew snem. Ka long ruh ka kabu ban pyrkhat kumno ban kyntiew shuh shuh ïa ka jylla ha ki 50 snem ban dang wan. U Bah Metbah u la khot la wer ruh ha kane ka sngi ïa ka jingïatreilang shi tylli da baroh lang na ka bynta ka roi ka kiew jong ka jylla Meghalaya.
Haba kren halor ka Ginger Mission jong ka jylla ïa kaba la ïoh ban plie dang shen da u Myntri Rangbah ka jylla, u Conrad K Sangma, u Bah Metbah u la ong ba kane ka Mission kan plie lad plie lynti ban kyntiew ïa ka ïoh ka kot ki nongrep jong ka District bad ka jylla hi baroh kawei, namar lyngba jong ka yn lah ban kyntiew ïa ka bor pynmih sying jong ka jylla, ban shalan ïa u bad ban shna jingshna de.
Ha kane ka sngi la ïoh jingpynshai halor ka Ginger Mission na ka tnad Agriculture bad ruh halor ka Public Distribution System na ka tnat Food & Civil Supplies ka jylla. La ïoh ruh ban sam ïa ki symbai sying hapoh ka skhim Ginger Mission-Spices Development Scheme 2022-2023 sha ki nongrep ka thaiñ.
Kiwei kiwei pat ki prokram ha kane ka sngi ki kynthup ïa ki dukan ba la buh da ki tnad sorkar bapher bapher bad da ki Seng treilang (SHG) bad la sakhi ruh ïa ki jingrwai bad jingshad tynrai na ki samla don sap ka thaiñ.
La ïoh ruh ban sam khusnam da ki kynrem ki lyndan sha ki nongjop jong ka jingïakob mareh marathon, jingïakop kyntip, thoh ese bad dro dur ïa kiba la pynlong kum shibynta jong kane ka jingrakhe.
