SHILLONG, Jymmang 22: Ka District Social Welfare Department ha ryngkat ka District Hub for Empowerment of Women bad ka Jowai Women Police Station, West Jaintia Hills District ki la pynlong ïa ka jingïalang kaba kyrpang ban pynkup burom ïa ka Samla Sawakani Lakiang, kaba la wanrah nam bad burom ïa ka District bad ïa ka jylla hi baroh kawei da kaba khur jingjop ha ka SAARC Women’s Bikini Model.
ïa kane ka jingïalang la pynlong ha Ophis treikam jong ka DSWO, kaba don ha Mookyrdup, Jowai. Ha kane ka sngi la synran lang ïa ka Sawakani Lakiang da u coach jong ka u Dr. Desire Kynjin ha ryngkat bad kiba haïing hasem. Kiwei ki riew pawkhmat kiba la don ryngkat ha kane ka jingïalang ki long ka Officer Incharge jong ki pulit kynthei (Women Police), ka Inspector I. Kharpran, District Mission Coordinator, Bah F.G.Rynnga, DHEW, ki ophisar bad ki nongtrei jong ka DSWO bad DHEW.
Ka Samla Sawakani Lakiang ka la ïoh ban khur ïa ka takma ksiar ha ka rynsan ïakop jong ka SAARC Women’s Bikini Model, World Fitness Federation ba la pynlong da ka South Asian Association for Regional Cooperation kaba la long ha Mumbai ha ka 19 tarik Jymmang, 2025.
Ka Sawakani ka la thaw ruh ïa ka histori ban long ka nongïalehkai kynthei kaba tang marwei na Meghalaya ban ïoh ïa ka Pro Card ha kane ka lympung ïakop.
Ka Sawakani Lakiang kaba na Tpeppale, Jowai, kadei ruh ka Ambassador jong ka Beti Bachao Beti Padhao, District Hub for Empowerment of Women, West Jaintia Hills District.
