Shillong, Nailur 23 : Ka Dorbar Shnong Laban ha ka janmiet sngi Ba-ar ka la pynlong da ka jingïalang pynkup burom kyrpang na ka bynta u MLA ka thaiñ Bah Sanbor Shullai hadien ba u la shah jied ban shimti kum u Myntri ba thymmai ha ka sorkar synrop jong ka Meghalaya Democratic Alliance ban peit ïa ka tnad AH&Vety, Arts and Culture nalor kiwei kiwei.
Ha kane ka jingïalang, na ka liang u Rangbah Shnong ka Laban u la ong ba kum ka shnong bad ka thain baroh kawei ki la dap da ka jingkmen kaba khraw haba u nongmihkhmat ka thain u la shah jied ban shimti ïa ka shuki Myntri Sorkar ka Jylla.
Ha ryngkat ka jingsakhi lang kiwei pat ki nongïalam shnong na ka thaiñ, na ka liang u Bah Sanbor u la ong ba u sngewkmen ka mynsiem ban ïohi ba ki nongïalam shnong ruh ki ïohi ïa ka jingïakhun bad ka jingpyrshang jong u ban wanrah ïa ka roi ka pa bad ka jingkylla kaba dei na ka bynta ka bha ka miat jong ka constituency baroh kawei ha kaba ki nongshong shnong ki dei na ki jaitbynriew bapher bapher.
“Ha ryngkat baroh ki paidbah jong ka South Shillong constituency nga ai khublei ïa ka Dorbar Shnong Laban kaba la ai jingithuh ïa nga bad ïa ki kam ba nga leh naka bynta ka constituency baroh kawei,” la ong u Bah Sanbor.
Shuh shuh u la pyntip ruh ba hadien ba ula shimti ïa ka shuki Myntri Sorkar, ula ïoh jingtip ba ula ïoh ïa ka mang tyngka kaba kot palat T.8 klur naka bynta ban siang thymmai ïa ka surok naduh Civil hospital Point ter ter shaduh St. John, Last Stop, Kenches Trace.
Nangta nalor kine, u ong ruh ba ki don bun kiwei pat ki skim kiba dei na ka bynta ka constituency la ka long naduh ki surok bad wat na ka bynta ban pynbha ïa ki lynti ïaid um ha ka thai nbaroh kawei.
U Bah Sanbor u la ong ruh ba ki kam pynroi ha ka thain ki kiew dei tang na ka jingsbun mynsiem ki trai jaka kiba la shah mon sngewbha ban pyndonkam ïa ki jaka jong ki la ka long na ka bynta ban shna surok bad kiwei kiwei ki jingdonkam kiba dei na ka bynta ka roi ka pa jong ka thain bad ka jingmyntoi jong ki nongshogn shnong.
