Pynkup burom ka District Urban Affairs ïa u Pulit ba la khlad noh haka Meri Matti Mera Desh ha Nongpoh
![](https://mawphor.com/wp-content/uploads/2023/08/WhatsApp-Image-2023-08-14-at-5.51.39-PM.jpg)
Nongpoh, Nailar 14: Ka District Urban Affair Unit, Ri-Bhoi District haka jingïatreilang bad ka Nongpoh Town Committee mynta ka sngi kala rakhe ïaka Meri Matti Mera Desh shibynta jong ka Azadi ka Amrit Mahotsav halor ka jingïaid lynti ba 75 snem jong ka ri India bala kynjoh ruh shibun ki mawmer bad ka thong jong ki paidbah, hakajuh ka por ban pynkup burom ruh ïa uwei u pulit (L) Helpingstone Nongkseh u ba la aiti ïala ka jong ka jingim bad bala khlad noh haka jingshah siat ha Garo Hills ban ïada ïaka ri haka jingïalang kaba la long ha ïing Dorbar Iewmawlong.
Ha katei ka prokram Meri Matti Mera Desh la wan ruh ban shim bynta da u Raja Brahma Additional Deputy Commissioner ka Ri-Bhoi kum u kongsan haka jingdonlang u Bah S Langstieh Assistant Engineer ka tnad Urban Affair ha Ri-Bhoi, Bah Successful Lyngdoh Chairman ka Nongpoh Town Committee, Bah Rayonald Kharkamni Secretary, Bah Vicky Syngkli Rangbah shnong kynthup ruh ïaki nonghikai bad khynnah naka skul Iewmawlong.
Naka liang ka DUA bad Nongpoh Town Committee kila pynlong ruh ka jingthungdieng bad kumjuh ruh ka jingïaid rally ryngkat ki lama India shuwa ka jingrakhe ïaka sngi laitluid jong ka Ri India.
Haba kren ha katei ka sngi naka liang u Raja Brahma u la ong ba katei ka prokram ka dei kaba la rakhe ha baroh kawei ka Ri India ryngkat ka jingbam smai ban kyntiew ban pynroi bad pynneh pynsah ïala ka jong ka ri bad ka riti ka dustur, bad dei hakatei ka prokram la pynkup burom ruh ïaki briew kiba la aiti ïalade naka bynta ka ri, bala aiti ruh ïaka jingpynkup burom sha ka lok jong u Bah (L) Helping Stone Nongkseh, ka kong Thiuslinda Nongrum.
U la ong ruh ba kila don shibun ki mynsien kiba la len lade ban aiti ïala ka jong ka jingim naka bynta ka ri, bad ka dei hok ïaki ba kin ioh ka jingpynkup burom halor ka mynsiem shlur jong ki la ka dei ha kano kano ka bynta bad lyngba katei ka sngi hadien bala ioh ruh ban pynkup burom ïa utei u pulit, ka long ruh kaba donbok ban pynlong ïa katei ka prokram kaba jop.