Shillong, Jylliew 25: Ka Bouncer Association of Meghalaya ka la ïoh ban rakhe ïa ka jingdap 19 snem ha ka jingïaidlynti jong ka hynnin ka Sngi Saitjaiñ jong ka taïew ba ladep lyngba ka prokram kaba la pynlong ha KJP Assembly Hall ha Barik.
Ha kane ka sngi ba kyrpang jong kane ka seng la ïoh ban ïadon ryngkatlang bad i Kong Isawanda Laloo, i ba dei i Director of Sports and Youth Affairs jong ka sorkar jylla bad u Bah Daniel Thangkhiew, u ba dei u Oficer on Special Duty jong u Myntri Rangbah, u Bah Finely L Pariat bad ki dkhot jong ka Bouncer Association of Meghalaya nangta ki dkhot jong ka Meghalaya Arm Wrestling Association bad ki katto katne kiba la shah khot sngewbha.
Ha kane ka sngi, ki nongkren ki la ai ka jingïaroh bad ka jingsngewnguh na ka bynta kane ka seng Bouncer Association of Meghalaya lane ka BAM, kaba la shim ïa ka synjam ban long kum ki nongap-pahara ha kiba bun ki jaka paidbah ban lait na kano kano ka huri-hura bad ruh na ka liang kine ki nongkren ki la aimynsiem ïa ki nongïalam jong ka kynhun ban trei shitom bad ban ïaid shakhmat ïa ka jingïaidlynti jong ki bad ban long ki rishot kiba skhem jong ka jylla.
Kane ka kynhun ka la ïoh ruh ban pynmih ïa ki rangkynsai kiba la wanram nam bad burom na ka bynta ka ri Khasi, kum u Johny Nongrum bad kiwei kiwei.
Ha kane ka sngi na ka liang jong ka BAM ka la ïoh ruh ban sam khusnam bad ki jingaisngewbha sha ki dkhot jong ka Meghalaya Arm Wresling Association (MAWA) kiba la ïoh ban khur namjop ha ka lympung ïakhun-kti kaba la long dang shen hapoh Jammu & Kashmir bad Mathura ha Uttar Pradesh, nangta la ïoh ruh ban pynkup burom ïa ki dkhot jong ka kiba la jop ha ki rynsan lehkai ïakura (Boxing), pyni doh-ksah, rah-markhia (Weight-Lifting) bad ka MMA.
Haba ai jingkren ha kane ka sngi, na ka liang jong u President jong ka BAM bad ka MAWA, u Bah Junestar Kharbuli, u la pynpaw ïa ka jingsngew-nguh hadien ba kane ka kynhun ka la ïoh ban kynjoh sha ka 19 snem ha ka jingïaid lynti jong ka.
Shuh shuh u Bah Junestar u la pynpaw ruh ba ka kynhun mynta ka la sdang ban ïar ha ki kam ba ka trei, u la ban ruh ba kane ka kynhun ka dei ka kynhun kaba kynthup ïa ki rang bad ki thei ïalehkai ba mih madan ha ki jait jingïalehkai bapher bapher, bad bun na ki, ki dei ki nongïashim bynta ha ki jingïalehkai bor-met.
Nalor jong ka Sport ba ki player ki ju ïalehkai, ka seng ka kwah ruh ban kyntiew bad donkam jingïarap ha kaba ïadei bad ka bai-lut bai-sep jong ki player haba ki ïalehkai.
Haba ai jingkren ha kane ka sngi, na ka liang jong ka Isawanda Laloo ka la ai mynsiem ïa kane ka kynhun ba kan ïai bteng ban trei ïa ki kam kiba bha bad ba kan nangkiew irat nangne shakhmat. Ka la ai khublei ruh ïa ki nongïalam kiba la leh shitom ban synran ïa kine ki nongïalehkai haba ki leit ban aireng shabar ka jylla.
Ha kane ka sngi sam khusnam jong ka Bouncer Association of Meghalaya sha ki nongjop kiba la wanrah nam na ka bynta ka ri Khasi la ïoh ban pynshit pynshngaiñ da ki jingrwai ba la pynsngew da i Jessica Soan bad u Bah Don Nongkhlaw.
