Nongpoh, Nailur 11: U lat ka jylla Assam, u Prof. Jagdish Mukhi haba leit ban shim bynta ban pynkup burom ïa ki samla pule ka Don Boco University, Sonapiur, Guwahati ha ka sngi Saitjaiñ, u la ong ba ngi dei ba long kita ki nongai mynsiem bad ki nongpynshlur na ka bynta ka pateng ban sa wan jong ki khun samla ba kin shim khia na ka bynta ban kiew sha ki kyrdan kiba shaneng ha ki bynta bapher bapher jong ka jingpule jongki.
Haba pynkup burom ïa kine ki samla pule katei ka University, nalor u Lat ka jylla Assam, u Prof. Jgadish Mukhi la don ryngkat ruh u Vice chancellor katei ka University, u Fr. (Dr.) Stephan Mavely, u Prof. Vice Chancellor, u Fr. Jose Palley bad u Fr. Joseph Nellnatt, Director katei ka University bad kynthup ki professor bad ki samla pule.
Haba kren ha kane ka sngi kum u kongsan, u Lat ka jylla Assam, u Prof. Jgadish Mukhi, u la ong kum ki samla pule ki dei ban don ka bynta kaba khraw bad ka jingiohi jngai kumno ban saiñdur ïa la ka jong ka ri, namar dei tang lada ki samla pule ki don ka mynsiem ban thaw dur ïa ka imlang ka sahlang ka wan ka jingkylla bad ka ri jong ngi kan kiew ha baroh ki liang.
U la buh ruh ka jingkyrpad sha kitei ki samla pule ba kin pyndonkam hok ïa ka jingstad kaba ki la ioh lum na katei ka University hadien ba ki la pyndep ïa ka jingpule jong ki ha ki kyrdan bapher bapher bad u khmih lynti ba kine ki samla kiba la pyndep ïa ka jingpule kin sa pynmih ïa u soh uba thiang ban kyntiew ïa ka imlang ka sahlang. Lyngba jong kane ka ngi, ka Don Bosco University ka la lah ban pynkup burom haduh 984 ngut ki samla ba la pyndep ïa ka kyrdan pule jong ki bad 472 ki dei kiba pyndep ïa ka Bachelor degree ha ka Engineering & Technology, Arts bad ka Basic Sciences bad 494 ngut kiba la pyndep ïa ka master degree ha ki subject bapher bapher bad shuh shuh 18 ngut pat ki dei kiba la pyndep ïa ka Doctoral Degree.
Shuh shuh, la ai burom ruh ïa ki 36 ngut ki samla pule kiba la pass bha lyngba ka Gold Medal ha ki subject bapher bapher bad kum ka University ruh ka la pynpaw ka jingkmen ba ki samla pule ki don ka jingkitkhlieh ban leh bha ha ka jingpule jongki, na ka bynta ka jingmyntoi jongki bad ka jingmyntoi ka imlang ka sahlang hi baroh kawei.
