Mawkyrwat, ‘Naitung 15 : Ka Nativity Higher Secondary School, Mawkyrwat lyngba ka kynhun jong ki khynnah skul barim ne ka Alumni Association ha ka jingïalam jong u bah kynpham Lyngdoh, President ka Alumni Association Nativity Higher Secondary School, Mawkyrwat (AANHSSM) mynta ka sngi ki la pynlong ka jingpynkup burom ïa ka samla Banrihun Lyngdoh Marshilong kaba la ïoh ban khur ïa ki 2 tylli ki takma ksiar ha ka jingïalehkai ha ka Arm Wrestling National Championship (AWNC) 2025 kaba la long ha ka jylla Kerela.
Lah ban kdew ba ka samla Banrihun Lyngdoh Marshilong, 17 snem karta ka dei ka khynnah skul kaba dang shong ha ka klas IX ha Nativity Higher Secondary School, Mawkyrwat bad kum shibynta ban ai mynsiem shuh shuh ïa ka samla Banrihun kaba la wanrah burom ym tang ïa lade hynrei ïa ka jylla bad ka ka distrik hynrei ka la wanrah burom ruh ïa ka skul baroh kawei ha kaba ka kynhun ki khynnah skul barim ki la pynlong ïa ka jingpynkup burom ka ban long ruh ka jingaimynsiem ïa kiwei de ki para khynnah skul jong ka Nativity Higher Secondary School, Mawkyrwat.
Ha kane ka sngi la sakhi lang da u Principal jong ka Nativity Higher Secondary School, Mawkyrwat u Rev. Father Alfonsus Wahlang, ka Headmistress jong ka Nativity Higher Secondary School, Mawkyrwat ka Sister Sabina Maiong, ki nonghikai, ki khynnah skul lem bad ki ki dkhot ka Alumni Association Nativity Higher Secondary School, Mawkyrwat kiba long naduh u samla Dawningstar Marweiñ, u bah Kordor Kharlyndoh.
