Nongpoh, K’lyngkot 09: U Superintendent of Police ka Ri Bhoi u Giri Prasad mynta ka sngi u la shim ïa ka bynta kum u kongsan ban pynkup burom bad ban pyndeng ïa ki jingdeng ïa ki 2 ngut ki Pulit, kiba dei hadien ba ki la ïoh ban kiew kyrdan haka kam shakri kum ki Pulit ha ka jylla Meghalaya.
Kine ki 2 ngut ki Pulit kiba la ïoh ban kiew kyrdan ki kynthup ïa u Bah Pyniarlang Thabah uba la ïoh ban kiew kyrdan na ka kyrdan Sub Inspection sha ka kyrdan Inspector of Police bad u Madhuraj Dorneng u Pulit Constable uba la ïoh ba kiew kyrdan sha ka kyrdan Head Constable.
Ïa kane ka jingpynkup burom la pynlong ha ka ophis u Superintendent of Police ka Ri Bhoi ha Nongpoh ba la lam khmat da u Superintendent of Police u Giri Prasad ha ryngkat ka jingdon lang kiwei kiwei ki pulit ophisar ka Ri Bhoi District.
Na ka liang u Superintendent of Police ka Ri Bhoi u Giri Prasad ryngkat ka ophis hi baroh kawei, hadien ba la dep ban leh burom bad ban pyndeng ïa ki jingdeng kaba kitei ki ar ngut ki Pulit ki la ïoh ban kiew kyrdan, ki la ai ruh ka jingkitbok kitrwiang ïa kitei ki 2 ngut ba kin dang lah shuh shuh ban shakri kham bha kum ki pulit na ka bynta ka shongsuk shongsaiñ ki paidbah ha kane ka District bad ha ka jylla hi baroh kawei.
Shuh shuh, ka ophis u Superintendent of Police ka Ri Bhoi, ka la ai ruh ka jingkitbok kitrwiang ba kin dang kiew shaphrang ha ka kam shakri bad khamtam ba kin shim ïa ka jingkitkhlieh kum kita ki Pulit ban shakri ïa ki paidbah kumba la bynshet ïa ka kamram da ka sorkar.
