Nongpoh, Jymmang 28: Namar ka jingkmen bad sngewsarong halor ka jinglah jong ka Samla Saphirihun Lyngdoh naka skul Alpha English Higher Secondary School Nongpoh ban lehbha haka eksamin SSLC bad rung ruh haka kyrdan ba 18 jong ka Top 20, naka liang ka Khasi Student Union, Nongpoh Circle haka jingïalam jong u Bah John Lyngdoh kum u President bad u Samla Baïashanlang Kharshanlor Secretary ryngkat ki dkhot jong ka Nongpoh circle bad ka KSU Saiden Unit haka sngi Saitjaiñ ki la leit sha ka ïing sah jong ka Saphirihun Lyngdoh haka shnong Saiden ban pynkup burom bad ai mynsiem ïa katei ka Samla ïaka jinglah jong ka ban kheit ïa u soh uba thiang lyngba ka jingtrei minot jong ka haka jingïaleh ïaka eksamin Matrik.
Ki Nongïalam jong ka KSU Nongpoh Circle, haba ai jingkren ha katei ka sngi, ki la pynpaw ïala jongsngew sarong ban ïoh sngew ba ka samla napoh ka thaiñ Nongpoh kan ïoh ban poi shaduh katei ka thong, kane ka long ka burom kaba khraw ym tang ïaka iing ka sem, ka shnong ka thaw hynrei ïaka District bad ïaka jylla hi baroh kawei. Ki la ai ruh ïaka jingïaroh ïa kane ka samla ba wat la ka don hapdeng shibun ki jingeh hynrei ka la lah ban kheit ïa u soh u ba thiang ryngkat ka jingkyntu kynpham ba kan nym sangeh ïaka jingïaleh ka jong ka da kaba ai mynsiem ruh ba kan dang ïaitrei shitom shuh shuh haki jingpule ba kham shalor.
Naka liang ka KSU ka ai khublei ruh ïaki bahaïing hasem jong ka Saphirihun ba ki la long ki nongkyrshan ki ba ha syndah bad lyngba ka jingshem phang jong ki ka Saphirihun ka la lah ban kot shaduh katei ka thong namar ka jingkyrshan bad ai mynsiem ba hakhmat hi ka dei na la iing na sem.
U Samla Baïashanlang Kharshanlor u la ong ruh ba kam dei ban bud tynneng ïa kiwei ban leit pule sha ki jaka pule kiba kham shalor, namar ka jingnang jingstad kam shong haki jaka pule hynrei kadei hi lyngba ka jingtrei shitom ban kynjoh sha ka thong ka jingjop da kaba bynrap ruh ba ka seng kan don bynta lang bad katei ka samla ha kino kino ki liang lada ka shem jingeh, u la bynrap.
