Nongpoh, Naitung 11: Ka Confederation of Ri-Bhoi People (CoRP), kala pynkup burom bad ai mynsiem ïa 35 ngut ki samla pule kiba la pyndep bad wan sahkhmat haka eksamin SSLC, HSSLC, Graduate bad kumjuh ruh ïa 2 ngut ki samla ba kynthup ïaka Bantisha Diengngan kaba la pyndep ïaka Post Graduate haka tnad Water and Soil Agriculture bad ka samla Dr. June Merry Diengngan kaba la pyndep ïaka Bachelor of Dental Surgery BDS ba kin dang leh bha shuh sha ki jingpule jong ki ba kham shalor haka jingïalang kaba la long ha ka sngi Saitjaiñ haka shnong Nongsder.
Ha katei ka sngi la don ryngkat ruh da u Bah Jonas Lyndem Rangbah Shnong Nongsder kum u kongsan, u Bah Bandari Ryntathiang President, Gershome Hat Vice President, Markus Makri Joint Secretary, u Ashok Khongsit Finance Secretary bala synran lang ruh da ki kmie ki kpa.
Haba kren ha katei ka sngi naka liang u Bah J Lyndem Rangbah Shnong u la ai ka jingïaroh ïaka seng CoRP kaba la shim ïaka sienjam ban pynkup burom ïaki samla pule ha katei ka shnong da ka jingangnud ban dang pynshlur bad ai mynsiem shuh shuh ïaki ba kin dang lah ban lehbha shuh shuh haki jingpule ba kham shalor ba kin long ruh ki nuksa bad ki khlur ba tyngshaiñ ki ban wanrah ïaka nam bad burom ïaka iing ka sem, ka shnong ka thaw bad ka district baroh kawei.
U la kyntu ruh ïa kitei ki samla pule ha katei ka sngi ba kin long ki samla kiba don ka jingkitkhlieh ha iing ha sem ban long ki samla kiba ïaid haka lynti ryngkat ka akor ka burom bad khamtam eh ban long ki samla kiba don ka thong haka jingim jong ki ban trei shitom khnang ba kin poi sha ka thong kumba ki angnud haka jingim jong ki.
Naka liang u Bah Bandari Ryntathiang u la pynpaw ba kum ka seng ka ju pynshlur ïaki samla pule naka por shaka por lyngba ki khusnam ban ai mynsiem ïaki samla bad kumjuh ïa kiwei ruh kiba dang don hapdeng ka jingpule ba ki dei ban trei shitom bad ban don ka mynsiem ïaleh haka jingim jong ki namar khlem ka jingnang jingstad ka long lehnohei ha kane juk ba mynta.
