Pynksan u CM ba la pynbeit ïa u pud u sam da ka jingïasyllok shwa bad kiba sah ha khappud

Shillong, Lber, 31: U Myntri Rangbah ka Jylla u Conrad Kongkal Sangma ha ka sngi Palei u la pynksan ba ka jingïapynbeit ïa u pud u sam ha ki hynriew tylli ki jaka ba ïakajia pud hapdeng ka Meghalaya bad ka Assam ka dei da ka jingïasyllok naduh nyngkong eh bad ki paidbah kiba shong basah ha ki shnong khappud.
Kane ka jingpynksan jong u Myntri Rangbah ka long hadien ba ki MLA jong ka AITC kaba shong ha ka Liang Pyrshah ki la ïai ban ba ka Sorkar Meghalaya Democratic Alliance ka dei ban khot ïamir jingmut bad ïasyllok lang bad ki kynhun bapher bapher halor kane ka jingïapynbeit ïa u pud u sam bad ka Jylla Assam.
Dang ha ka sngi Balang u Myntri Rangbah ka Jylla Meghalaya u Conrad Kongkal Sangma bad u Myntri Rangbah ka Jylla Assam u Himanta Biswa Sarma ki la ïasoi ïa ka Dulir jingïasngewthuh jingmut (memorandum of understanding) hakhmat u Myntri ka tnat Kam Pohing u Amit Shah ban pynkut noh ïa ka jingïakajia pud kaba la neh jin haduh san phew snem kynthih hapdeng ka Meghalaya bad ka Assam.
“Bun kiba ong bad khamtam na ka Liang Pyrshah ki la dawa ba (ka Sorkar) ka dei ban ïasyllok lang bad ki Kynhun bapher bapher. Ngam tharai shuh ba dang donkam ïa ka jingïasyllok bad ki kynhun bapher bapher namarba ngi ladep leh naduh hynriew bnai mynshwa. Ka long kaei kaei kaba sngewsih ban ïohi ba ka Liang Pyrshah ka wanrah ïa kane ka mat bad ïaiban ba dang donkam ïa ka jingïasyllok bad ki kynhun bapher bapher,” u la ong.
“Naduh ka sngi banyngkong ngi la leit sha ki paidbah bad ka dei ka mon jong ki paidbah bad hadien ka jingïasyllok bad ki paidbah ngi la shim ïa ka rai,” u la ong.
Haba pynpaw ba kane ka mat ïapynbeit pud ka dei kaba jwat, u Myntri Rangbah u la ong, “naduh kaba sdang nga la pynpaw ba kam long kaba suk ba baroh ha Meghalaya kin kwah ïa kane hynrei kawei na ki lad kaba bha tam ngi la lah ban ïoh ïa ki jaka ba ki briew jong ngi ki shong ki sah, kiba la wan sha Meghalaya.”
U la ong ruh ba ki kyndon ba la pyntreikam hapoh ka Jylla Meghalaya la pyntreikam ruh hapoh ka jylla Assam.
U la ong ruh ba ka Liang Pyrshah ka donkam ban ai ka jingïatreilang hateng hateng na ka bynta ka jingbit jingbiang bad ka jingmyntoi ki paidbah nongshong shnong ka jylla.
Shuh shuh u la ong, “nga sngewkmen lyngba ka jingïarap lem jong ka Ministry of Home Affairs bad da ka jingïatreilang jong u Myntri Rangbah ka Jylla Assam la lah ban wad ïa ki lad ki lynti ban weng ïa ki jingeh ha ki hynriew tylli ki jaka ba ïakajia pud.”
U la ong ruh ba ka jingïasoi ïa ka Dulir jingïasngewthuh jingmut hapdeng ka Meghalaya bad Assam yn sa pynskhem da kaba shon muhor sa ka Parliament.
Haba pyntip ba ïa kane ka kam yn sa pyndep lyngba ka sorjamin ban sa leh da ka Surver of India, u Conrad u la ong, “ïa ka jingpruiddak yn sa leh da ka Survey of India bad ïa ka jingsorjamin yn sa leh lang da ka Sorkar Meghalaya bad ka Sorkar Assam bad yn ym lah satia ban shu leh tang marwei. Ynda ladep kane ka bynta, ngi khmihlynti ba ka Sorkar India kan ai jingithuh bad pruiddak biang ïa u pud u sam ha kaba yn sa phah pat sha ka Parliament na ka bynta ban ai jingmynjur.”
Halor ka jingsieh mawpud ka Assam ha u pud u sam jong ka West Khasi Hills District bad ha Ribhoi District, u Conrad Sangma ula ong ba u la ïakren ïa kane ka kam bad u Myntri Rangbah ka Jylla Assam.
“Nga la ïoh jingtip ba la thung ïa ki mawpud plastik ha ki katto katne bynta kba dang hap hapoh ka West Khasi Hills bad mar mar nga la ïakren bad u Myntri Rangbah ka Jylla Asam bad ma u ruh u la pynpaw ïa ka jingsngewkhia halor kane bad ong ba kane kam dei shuh ban jia lano lano ruh. Nga ruh nga la phah tohkit,” ong u Conrad.
Halor ka jingkylli lano yn sdang noh ïa ka jingïapynbeit pud ha ka kylla kaba ar, u Conrad u la ong, “ngam pat lah ban ong eiei. Lehse ngin sa hap ban leh kham kloi bad ngam tharai ba yn leh noh mynta mynta hynrei nga kular sha ki paidbah nongshong shnong jong ka jylla ba ngi ruh ngi sngewkhia bha halor kane bad ngin sa leh ïa kaei kaba bha tam ha ka jingïapynbeit pud ha ka kylla kaba ar.”