Shillong, Nohprah 05: Ka sorkar jylla ka la kyntiew ïa ka jingsiew ïa ki Anganwadi Worker da 1500 tyngka. Nangta ïa ki Mini Angwanwadi Worker da 750 tyngka bad ïa ki Helper da 500 tyngka naduh ka 1 tarik u Risaw 2022.
Ïa kane la pynbna da u Myntri Rangbah ka jylla, u Conrad Sangma mynta ka sngi ha ka jingïalang State Convention of Frontliners kaba la long ha SICPAC, Shillong. Ha kane ka sngi u Conrad la pynbna ruh ba la thaw ïa ka CM CAREs, kaba mynshuwa la ju tip kum ka Chief Minister’s Social Assistance Scheme na ka bynta ki briew bym shait bym khlaiñ, ki kynthei ba la ïap lok, kiba don jingduna dkhot met.
Haba kren ha kane ka jingïalang, u Myntri Rangbah, u la ong ba ki Anganwadi Worker bad kiwei kiwei de ki nongtrei ka koit ka khiah ha ki shnong ki thaw kidei ki nongtrei ba hkhmat eh ban wanrah ïa ka jingkylla ha ka imlang sahlang, namar dei ma ki, kiba lum ba lang ïa ki nongshongshnong na ka bynta ban pynsngewthuh ïa koit ka khiah ïa ki khynnah bad ïa ki longkmie. “Dei ma ki kiba la ïarap ïa ka jylla na ka bynta kito ki khynnah bad ki longkmie kiba don hapdeng ka jingpang ba duna bam”, la ong u Conrad.
