Shillong, Jylliew 19 : Ka National People’s Party (NPP) da ka jingïatrei lang bad ka Congress ki la pynkhyllem kyndit ïa ka Executive Committee (EC) ba ïalam da ka United Democratic Party (UDP) ha Khasi Hills Autonomous District Council (KHADC) hynne ka sngi Nyngkong.
Ia kane ka Executive Committee ba ïalam da u MDC ka UDP na Sohra Bah Titostarwell Chyne kum u Chief Executive Member (CEM) la pynkhyllem lyngba ka No Confidence Motion (NCM) ba la wanrah da u MDC ka NPP na Rambrai-Jyrngam Bah Bajop Pyngrope pyrshah ïa u ha ka sngi sdang jong ka Dorbar Lyiur ka Council mynta ka sngi.
Ka No-Confidence-Motion ka la ïoh ïa ka jingkyrshan jong ki 17 ngut ki Dkhot ka ïingdorbar ba don 30 ngut ki MDC, kaba la biang pura u nombor ban pynkhyllem ïa ka Executive Committee.
U Lamphang ka Iingdorbar Bah Lamphrang Blah ula wanrah ïa ka NC sha ka jingïavote bad pynbna syndon ba ka EC hapoh ka jingïalam u Bah Titosstarwell Chyne kala khyllem mynta ka sngi hadien ba 17 ngut ki Dkhot ki la kyrshan ïa ka NC pyrshah ïa u.
Kine ki 17 ngut ki MDC ba kyrshan ki kynthup ïa 11 ngut ki MDC ka NPP bad 6 ngut ki MDC ka Congress
U Bah Lamphrang ula pynbna ruh ba ïa ka elekshon ban jied thymmai ïa u Chief Executive Member (CEM) yn sa pynlong lashai ka sngi ba-ar ka 20 tarik Jylliew ha ka por 11 baje mynstep.
Ula bthah ruh ïa ki dkhot ba kwah ïakhun ïa ka elekshon ba kin leit thep kyrteng noh mynta hi ka sngi sha u Secretary ka Tnad Legislative bad ïa ka jingbishar kyrteng yn sa pynlong mynta hi ka sngi.
U MDC ka Sohryngkham Bah Pynïaid Sing Syiem u la leit thep kyrteng kum u kyrtong ka NPP ban ïakhun ïa kane ka elekshon CEM ba thymmai jong ka Council.
Shuwa ia kane, u Bah Titos ula ñiew ïa kane ka No Confidence Motion kum ka kam shet kylla jong ka NPP.
