Shillong, Nailur 27 : Kum shi bynta ban rakhe ïa ka World Tourism Day, ka NIPS Hotel Management kaba don ha Umkdait, Nongmynsong mynta ka sngi Balang ka 27 tarik Nailur 2023 ka la pynlong da ka jingpynkhuid ïa ka Nan Polok.
Ïa kane ka jingpynkhuid da kaba tam ïa ki plastic, ki niut ki ñier kaba la sdang naduh ka por 11 baje mynstep la wan ban ïashim bynta da ki samla pule shynrang bad kynthei jong ka NIPS Hotel Management ba kynthup ruh ki staff, u Bah Damiano D.C. Malngiang uba dei u lecturer bad u Simang Basumatary uba dei u Centre Head jong ka NIPS Hotel Management.
Ha kane ka sngi la pynlong ruh ïa ka singature campaign ha khyrdop kaban rung shapoh Nan Polok. U Bah Damiano D.C. Malngiang haba ïakren bad u nongthoh khubor u la ong ba ka jingpynlong ïa kane ka jingpynkhuid ka long ban pynlong ïa ka mei mariang kaba khuid ba suba. U la ong ba ki la jied ban pynkhuid ïa ka Nan Polok namar kadei kawei na ki jaka jngohkai pyrthei bad khnang ba kiba wan shangkai pyrthei kin ïohi ïa ka jingkhuid jingsuba jong kane ka jaka.
Na ka liang u Simang Basumatary u la ong, “Ka Jylla kadei ka jong ngi bad ngi ïalam ïa ki samla pule ba kin sngewthuh ïa ka jingkordor jong ka khuid ka suba bad ruh ban pynlong ïa ka Nongbah kaba khuid ba suba”.
U la ïathuh ba mynta ki sdang shuwa na Nan Polok bad nangne shakhmat kin sa pynkhuid pat sa ha kiwei pat ki jaka jngohkai kiba don ha kylleng ka jylla.
