Pynkhuid ka Goldstone ïa ki sawdong sawkun ha ka jingrakhe ïa ka Swachhata Hi Seva

Khliehriat, Nailur, 25: Ki nongtrei jong ka Goldstone Ltd, East Jaiñtia Hills District, ha ka sngi Palei ki la mih ryntih bad pynkhuid ïa ki sawdong sawkun ha baroh ki jaka ba hap hapoh ka kompeni bad ïa ka ïew ha ka shnong Musiang Lamare bad kane ka jingpynkhuid ka long kum shi bynta ka jingrakhe ïa ka taïew Swachhata Hi Seva 2025 (SHS-2025).
Ïa ka jingpynkhuid la lamkhmat da ki nongtrei na ki lai tylli ki par ba kynthup ki nongtrei jong ka Umsangat Limestone Mine block – I, ka Umsangat Limestone Mine Block- II bad ka Umtyra Limestone & Clay Mine bad ha shwa ban pynlong ïa ka jingpynkhuid ki nongtrei ki la shim ïa ki kyntien jingkular.
U Satya vir Prasad Gupta, uba dei u Executive President u la ong ba ka jinglehkhuid ka long kaba donkam na ka bynta ka koit ka khiah, u kyntu ïa ki nongtrei jong ka company Goldstone bad ïa kiba shong ba sah hapoh u pud u sam jong ka company ba ki dei ban long kiba lehkhuid namar ka jinglehkhuid kynthup ïa ki sawdong sawkun ka ïada na ki khniang jingpang bad ong ruh ba na ka por sha ka por ki nongtrei kin pynlong ïa ka jingpynkhuid ïa ki sawdong sawkun.
U Senior Manager, u Basanta Kumar Sutar, u la ong ba kane ka taïew Swachhata Hi Seva 2025 ka dei ruh ka jingpynshai ïa ki nongtrei jong ka Goldstone Company kin pynkhuid sha ki shnong ki thaw ruh bad kane ka prokram yn pynlong haduh khatsan sngi bad kane ka dei ka jingbuh thong ka sorkar India bad ka company ruh kan pynlong ïa kane ka prokram pynkhuid ka ban long ruh kum ka awareness prokram.