Pynkhuid bad pushara ki longkmie ka shnong Mawroh ïaki lynti shnong shuwa ban pdiang ïaka Christmas

Nongpoh, Nohprah 13 : Kumba ju leh man u snem shuwa ban pdiang ïaka Christmas bad u snem thymmai, ka seng longkmie jong ka shnong Mawroh ha Ri-Bhoi District mynta ka sngi kila mih paidbah ban pynkhuid ïaki lynti syngkien jong ka shnong bad ruh ban pushara da ka rong ha shilynter ki lynti ïaid kjat bad ki rud surok ha syndah ka sor Nongpoh hapoh ka jingïalam ka Kong Margret Rymbai kum ka President bad ka Kong Novena Nongrum kum ka Secretary ha ryngkat kiwei kiwei ki longkmie.
Naka liang ka kong Margret Rymbai kala ong ba kane ka jingpynkhuid bad pynitynnad ïaka shnong ka dei kaba ki longkmie ka shnong Mawroh ki ju leh man u snem shuwa ban pdiang ïaka Christmas bad u snem thymmai naka bynta ban wanrah ka khuid ka suba bad ka jingitynnad jong ka shnong kaba long ruh ka nuksa sha kiwei ruh ki shnong ban pynsngewthuh ba ngi donkam ïaka jingkhuid bad ka jingitynnad.
Lyngba kane ka kyrwoh naka liang ki longkmie ka shnong Mawroh ki phah ruh ka khubor Christmas ba suk ba kmen ïa baroh ki paidbah ka jylla ba ngin pdiang ïa kane ka Christmas da ka jingkhuid ka dohnud khlem kano kano ka huri hura kaba lah ban pynkulmar ïaki shnong ki thaw bad ngin pdiang ïa u snem thymmai kumjuh da ka jingkmen ba u Blei nongbuh nongthaw un dang kyrkhu bad pyndap kyrhai ïa baroh.