Khliehriat nailur 8: U bah Reachingson Saingshai, uba wad RTI ha kaba ïadei bad ka rukom thungkam ka tnat District Selection Committee ha East Jaiñtia Hills District u la ong ba u la long uba la khreh wat ban leit ujor shaduh ïingbishar ruh bad une u rangbah haduh mynta um pat ioh pdiang ïa ki jubab RTI watla ka por ka la palat ïa ka shi bnai ruh.
Mynta ka sngi, utei u rangbah uba na shnong Wapungskur, East Jaiñtia Hills District u la leit buddien biang na ophis DSC East Jaiñtia Hills District ha kaba ïadei bad ka RTI kaba lai kaba u la buh naduh ka 9 traik u naitung 2025 kaba um pat ioh pdiang ïa ka jubab bad ong ba ka la don ka jingpynshai na ka liang ka Billing Assistant bad ki heh sorkar kiba dei peit bad ka jubab pat kaba da ka jingthoh um pat ioh pdiang.
La ong ba ïa utei u nong pan RTI la khot myn ha ka 26 tarik u bnai nailar 2025 ban bishar bniah ïa ki jubab hynrei ka jingthoh pat um pat ioh satia, u la ong shuh shuh ba kane ka jing buh RTI jong u ka long ruh ym tang ban wad bad tih bniah ïa ka rukom treikam ka DSC, hynrei ban ai mynsiem ruh ïa ki samla wad kam kiba aplai kam ha DSC ha East Jaiñtia Hills District bad ngnud ruh ba ki heh sorkar ba dei peit ïa kane ka kam ba ki dei ban bishar ïa kane ka kam bad pynioh ïa ka hok jong u kum u nongbuh ïa ki RTI kaba katkum ka RTI Act 2025.
Ka jingong jong u ba un leit sha ki bor ba shalor ne sha ïingbishar ka long halor ka nongrim ba um pat ioh pdiang ïa ki jubab.
Ha kaba ïadei bad ka pisa kaba T5000 hajar tyngka tam kaba u dei ban siew bai RTI u la ong ba ïa kane ka pisa kaba da ki pisa khutia suda um pat siew namar um pat ioh ïa ki jubab na u PIO bad ka dei ka pisa kaba na ka bynta ka RTI kaba lai kaba u la buh bad un sa siew ynda u la ioh pdiang ïa ka jubab ha kti na u PIO.
