Shillong, Naitung : U MLA ka Mawlai u Bah PT Sawkmie hynne ka sngi u la pynpaw ba un hap ban pynkhreh skhim na ka bynta ki lai tylli ki shnong ha Mawlai, kaba kynthup ïa ka Mawroh, Nongkohlew bad Mawsiatkhnam na ka bynta ban shna ïa ki surok bad kiwei ki jingdonkam.
U bah PT Sawkmie u la hap ban pynkhreh ïa kitei ki skhim hadien ka jingjurip jong u ïa ka surok dong ryngkat bad u EE PWD bah C. Kharmudai, u rangbah shnong ka Mawlai Mawroh u bah Peter Lamare bad ki nongkitkam shnong ha ka sngi Palei ka 08 tarik u Naitung na ka bynta ban shna ïa ka surok kiba don hapoh shnong Mawlai Mawroh.
Na ka liang u rangbah shnong bah Peter Lamare, hadien ba la dep jurip ïa ka surok ka ba donkam ban shna thymmai ka ba rung na Kyntonlieh bad mih sha Mawlyndop u la pynpaw ba kane ka surok ka long kaba kyrpang bha bad ka ban ïarap ban pyllait ïa ka jingdheng kali kaba ju don khah khah ha lai lad kaba leit sha skulbah North Eastern Hills University.
Katba hynne ka sngi Thohdieng u MLA ryngkat bad u EE ka PWD Umsning ki la jurip sa ïa ka kynroh ha Nongkohlew kaba dang shna shaid shaid, ïa ka surok bad ka kynroh jong ka balang All Saint (CNI) ka ba don ha Mawsiatkhnam ka ba dang shna, ka ba long kum shi bynta jong ka jingbuddien jong u ïa ka jingpyntrei ïa ka kam.
Ha kane ka jingleitjurip la ïohi ruh ïa ka jingmaramot ïa ka surok na Mawtawar, ter ter sha Nongkohlew haduh Mawsiatkhnam.
