Pynkhreh shait shait ka EWKH lada jia ka jingkhynñiuh jumai
Nongstoiñ, Naiwieng 25: Ka Ophis jong u Block Development Officer Mawthadraishan C&RD Block, ha ryngkat ka jingïatreilang bad ka District Disaster Management Authority DDMA Mairang, ka Block IRTS bad ka National Disaster Response Force (NDRF-01 Bn) Guwahati, ka la pynlong ïa ka jingai jinghikai ba ar sngi halor ki lad jingïada bad ki lad jingïarap ban ïarap ïa ki lanot lada kan jia shisha ka jingkhie jumai ne kino kino ki jingjia shah ktah na ka jinglong ka mariang.
Hadien kane la pynbud pat sa da ka mock drill ha baroh ar tylli kine ki jaka, kata ha ka 24 tarik bad 25 tarik mynta u bnai ha ka Ophis treikam u BDO Mawthadraishan bad ha Kynshi Mawria, Eastern West Khasi Hills District.
Ha ka sngi sdang jong kane ka training la pynlong hapoh ka hall jong ka Ophis ha ryngkat ka jingdonlang u BDO ka Mawthadraishan u bah W.L Massar, u DDMO u bah J.Mawthoh, u Inspector ka NDRF-01 Bn u Lal Ringsan, ki nongtrei ka Ophis BDO, ki dkhot ka Fire and Emergency Service Mairang, ki dkhot ka DDMA Mairang bad kiwei.
Ha kane ka prokram la ïoh ban ai ka jingpynshai ha kaba ïadei bad ka kamram ban pynkhreh lada jia kino kino ki jingjia hapoh ka ophis treikam, lyngba ka presentation na u DDM Officer Mairang u bah J.Mawthoh.
Nangta ha kaba ïadei bad ka jinghikai halor ka Safety aids na u Inspector NDRF u Lal Ringsan bad nangta la ïoh ïa ka jinghikai halor ka rukom pynlip ding na ki dkhot ka Fire and emergency service Mairang bad na ki dkhot ka NDRF-01 Bn, la ïoh ïa ka jinghikai ha kaba ïadei bad ka rukom ban ïarap ïa ki lanot kiba ngat ha ka jingjia shah lyngshop bor mariang kum u jumai.
Hadien ka jingai jinghikai la pynbud pat da ka Mock drill halor ka jingkhie jumai ha baroh ar tylli kine ki jaka ha Mawthadraishan Block bad ha Kynshi Mawria. La pynlong khnang ïa kane ka Mock drill ban ai ka jinghikai da kaba pynkhreh lada wan jia kino kino ki jingjia lynshop ka bor Mariang kum u jumai ka jingpluh ding bad kiwei, ha kaba la ïashimbynta da ki nongtrei ka BDO Mawthadraishan, ki nongtrei ka tnad DDMA Mairang, na ka tnad fire service Mairang na ka tnad NDRF-01 Bn, community volunteers bad kiwei de.