Shillong, Risaw 27: Ka jingpynlong ïa ka proseshon bah jong ka Balang Katholik ne ka Jyllaniam Bah Shillong ka ban long ha ka 10 tarik u bnai Naiwieng ka la pynkmen ïa ki riewngeit jong ka Balang hi baroh kawei bad wat ïa kito kiba dei na kiwei pat ki Jyllaniam Bah jong kane ka jylla bad halor kane la ïohi ba ka jingpynkhreh pynkhrum jong ka Balang Katholik khamtam eh ka Parish Cathedral ha Laitumkhrah mynta ka la ïaid shaid shaid.
Ha kine ki sngi la ïohi ba ka jingshna ruh ïa ka jaka ban pynlong ïa ka Mass Bakhuid ha Kalbari ka kam bad ka jingtei ka la nang ïaid shaphrang ba ki nongpyntrei ïa katei ka jaka ki la sdang ban pynsted bha ïa ki kam. La ïohi ruh ba bun na ki briew kiba ïaid na katei ka jaka kaba la shna ïa kane ka jaka ban pynlong ïa ka Mass Bakhuid bad kumjuh ïa ka jingmane sakramen ha ka por nohphai sngi hadien ba la pyndep ïa ka jingïaid proseshon, ki la ïapeit manla ka sngi naba ïohi ba ka jingpyntrei ïa ka kam ka la ïaid bha bad imat satang katto katne sngi kane ka jingpyntrei kan sa dep noh.
Lah ban pynkynmaw ba dangshen na ka liang ka Parish pastoral council bad ka parish baroh kawei bad baroh ki Lyngdoh kiba trei ha Ïingmane Bah Laitumkhrah dangshen ka la pynmih ïa ka jingpynbna ba ki la khot la wer ïa baroh ki para bangeit sha ka Proseshon Bah Ïukharist ka ban long ha ka 10 tarik u Naiwieng, 2024 ha Ïingmane Bah Laitumkhrah.
Ka la ong ba ka Mass Bakhuid kan long ha ka por 10 baje mynstep ha Kalbari da u Most Rev George Antonysamy vice president CCBI bad ka jingïaid Proseshon kan sdang ha ka por 1.30 nohphaisngi.
Ki don ki jaka shong bad ka LED screen ha madan Novice bad ki don ki jaka shong bad LED ha madan skul Devine Saviour.
Ki don ki jaka shong ha ka parking lot ha St. Edmunds School Higher Secondary School hajan Kalbari. Yn ym shah ïano ïano ban die jingdie ha madan compound jong ka parish. Dei ruh ban rah la ki ja song.
La kyrpad ïa baroh ki para bangeit ba kin sumar khuid haba ki wan na ka bynta kane ka Proseshon Bah bad ba kim dei ban bret pathar ïa ki jaboh khamtam ki plastic bad ba ym dei ban biah pathar ha ki jaka ba pynïeng ïa ki kali bad ha ki lynti syngkien nalor kiwei kiba kim dei ban leh.
