Nongstoiñ, Naitung, 13: Ka elekshon ban jied ïa ki nongmihkhmat sha ka Ïingdorbar Thaw Aiñ ka jylla ha u 2023, ka lah ban long kaba jyrwit jyrwat haduh katta katta bad kan long ruh ka election, kaba kito ki paitbah nongthep vote ki ba kheiñ kor ïa ka pisa, kin sa paw pyrthei haba shit haba shai.
Haba pyrshang ban twad jingmut na ki nongïalam jong ki seng saiñ pyrthei bapher bapher bad na ki paitbah nongthep vote jong ki lai tylli ki Constituency kiba hap ha West Khasi Hills ka sur kaba mih na ki ka long ba ha ka election 2023 lada kino kino kiba kwah ban ïaleh election, lymda kim pat don da ki klur tyngka ki dei ban shongkhop ha ïing namar kin ym jop da lei lei ruh em.
Don napdeng ki riew rangbah kiba ong ba ha kine ki sngi, la ka dei ha ki shnong ki thaw, ki balang, ne ha ka saiñ pyrthei, ïa kiba duk lada ki bha bad ki dei kiba tip briew tip blei bad kiba stad bad shemphang katno katno ruh kin ym ñiewkor shuh.
Ha kaba ïadei bad ka Nongstoiñ Constituency hadien ba ka HSPDP kam shym la ïatreilang shuh bad ka UDP bad baroh ar tylli ki party kin ïaid noh la ka jong ka jong, la ïoh jingtip ba ka UDP kan pynïeng beit ïa u kyrtong ha Nongstoiñ. Haba pyrshang ban twad jingmut bniah na ki katto katne ngut ki nongïalam ba khmat jong ka party, ki la ong ba ki la don lypa ïa ki kyrtong hynrei ïa mynta kim pat kwah ban ïathuh ïa ki kyrteng jong ki, namar ka por ban ïalap election ka dang jngai.
Hynrei ka jingpynkhreh narieh narieh te ka la ïaid shait shait bad ki riew shempang, ki riew donsap ha ka politics ki la wan ban ïaphylliew jingmut bad ki nongïalam ka party, khnang ba uno uno u ba ka party ka ibit ban pynïeng, un poi sha ka thong bad kim don jingartaien hi ruh, namar wat la da ki don da ki phew ngut kiba aplai tiket ruh, ki la dep rai skhem ba kin ïatreilang bad kin da trei shitom haduh ba kin da poi sha ka thong ba ki la thmu.
