Shillong, Jylliew, 27: U Deputy Inspector General of Police (Eastern Range) Davis NR Marak ha ka sngi Palei u la ïathuh ba ka tnat Pulit jong ka Jylla Meghalaya ka long kaba la pynkhreh ban pyntreikam ïa ki aiñ ba thymmai, ka ban sdang naduh ka 1 tarik, Naitung.
“Da kaba ïathuh kumta, ngin sa lah ban tip ïa ki jingshah tynjuh ynda ngi la sdang ban pyntreikam. Haoid, ngi la leh ïa kaba bha tam ban pynkhreh ïalade na ka bynta ban pyntreikam ïa kine ki aiñ,” ong u Marak ha ka jingïakren bad ki lad pathai khubor hadien ba la kut ka jingïathir ïatai halor ka jingpyntreikam ïa ki lai tylli ki aiñ ba thymmai.
Ki lai tylli ki aiñ ba ïadei bad ki kam bymman ba la mynjur da ka Parliament ki kynthup ïa ka Bharatiya Nyaya Sanhita (BNS), ka Bharatiya Nagarik Suraksha Sanhita (BNSS), bad ka the Bharatiya Sakshya Adhiniyam (BSA), ki ban bujli noh ïa ka Indian Penal Code 1860, ka Criminal Procedure Code 1973, bad ka Indian Evidence Act 1872.
“Ngi ladep ai jinghikai pura na ka bynta ki Pulit Ophisar, kiba hap ban pyntreikam ïa kine ki aiñ ba thymmai bad ngi kyrmen ba kin sngewthuh bha namarba ki ladep ban ïoh jinghikai. Namarkata, mynta hadien ba ngi ladep ai jinghikai ngin hap ban pyntreikam pura ïa ki,” u la ong.
Haba kylli, u DIG u la ong ba ki aiñ kiba rim pyrshah ïa ki kam runar ïa ki kynthei bad ki khynnah kin nang kham khlaiñ shuh shuh da ka jingwan jong kine ki aiñ ba thymmai kiba ïadei bad ki kam bymman.
“Ngi don ruh ka jingkyrmen ba kin (aiñ thymmai) ïarap ban pynduna ïa ki kam runar pyrshah ïa ki kynthei,” u la bynrap.
