Pynkhreh ka sorkar ban pynbeit ïa ka kam kiba die madan hapoh ka thaiñ Laitumkhrah: Ampareen

Shillong, Nailar 22: Ka Myntri ka sorkar jylla bad ka MLA ka East Shillong ka Kong Ampareen Lyngdoh ka la ong ba ka sorkar ka dang pynkhreh ïa ka plan ban shimkam ban pynbeit ïa ka kam kiba shongdie madan ha Laitumkhrah.
Ka la pynpaw ka jingkyrmen ba ka rai jong ka sorkar ban pynkynriah ïa kiba die madan kan lam sha ka jingkylluid jong ka Laitlumkhrah kumba la long mynta ha Khyndailad.
Haba kren sha ki lad pathai khubor ha ka sngi Thohdieng, ka kong Lyngdoh ka la pynthikna ba ka sorkar kan pynbeit ïa kane ka jinglong jingman da kaba peit bha bad ba ka thong ka long ban ïoh ka rai kaba bha ka ban pynmyntoi ïa baroh ki kynhun kiba donkti ha kane ka kam.
“Ka sorkar ka donkam ban kynmaw ba ka jingtuklar ka Ïingkashari ka dei kaba hajan na ka bynta manla ki nongshong shnong. Ngin pynbeit ïa kane da kaba sumar bad ban peit bha. Ngin khmih bniah ïa ka jinglong jingman. Nga kyrmen ba sa shisien kan long ka kam kaba bha bad nga kyrmen ruh ban ïohi ïa ki surok ka Laitumkhrah kumba long ka Police Bazaar Khyndailad mynta,” ong ka Myntri sorkar.
Haba ong ba ka long kaba donkam ba kheiñ bad ban poi sha ka thong haba pynbeit ïa kane ka kam, ka Kong Lyngdoh ka la ong, “Kadei ka kam kaba kyllaiñ bha bad kum ka nongshong shnong kaba don ka jingkitkhlieh ngan ym kren ne ban ai ki jingtip ha kane ka por naba ka dang long kaba kloi palat. Lano ngin pynkynriah ïa ki, kumno ngin pynkynriah ïa ki bad shano ngin pynkynriah ïa ki, phi hap tang ban long kiba ïaishah. Kynmaw ba ngi hap ban ïadei bad ka jingim jong ki briew bad ha ki jingpyrshang jong ngi ban pynbeit ïa ki jingeh kiba ïadei bad ka ïoh ka kot, kumta ngi hap ban peitbha.”
Kane ka jingkren jong ka, ka long hadien ba ka sorkar jylla dang shen ka la pynbna ïa ka rai ban pyndep pura ïa ka jingpynkynriah ïa kiba die madan na Laitumkhrah, na Civil hospital point bad na Them Bijoy shaduh Motphran lyngba ka kyrdan kyrdan.
“Kadei sa kawei pat kaba hap ban pule ha ka kynroh kaba ngi hap ban pynbeit hynrei nga pynthikna ïaphi ba ka sorkar ka long kaba isynei bha halor kane ka kam,” bynrap ka Kong Lyngdoh.
Shuh shuh ka Myntri ka la pynthikna ba kan ym don kano kano ka jingleh drama haba pynbeit ïa kane ka kam kiba die madan.
“Ngin ym pyndon bynta bad ki drama namar ki drama kim dei ka lynti na ka bynta kine ki jinglong jingman. Nga sngewthuh ba ki jingsngew ki lah ban mih. Ki briew ki lah ban ong kaba ki sngewkwah ban ong, ki lah ban pynmong ïa kino kino, ka jingrah ïa ki tiar pynmynsaw, ngi la ïohi ïa kito ki drama hynrei kine ki drama kin ym wanjia hapoh ka jaka jong nga,” ka la ong.
U Myntri ka la kdew ruh ba ka dorbar shnong Laitumkhrah ka la pynkhreh ïa ka plan ban shim kam ha ka jingïatreilang bad ka sorkar bad da kaba ong ba ka jingïashim bynta jong ki paidbah ka long kaba kongsan ban wanrah ïa ka rai kaba bha.