Shillong, Jylliew: Hadien ka jingsyier ka ba mih ha ka imlang sahlang namar ka jingsar jong ka khlam ha kine ki snem ba ladep, bad hadien ba ka suk ka saiñ ka la wanphai biang kumba ju long, kumta ruh kum ka jingpynkhreh na ka bynta ka Dorbar Kur ha Sohryngkham, ka Seng Kur Warjri ka la pynskhem ïa ki shnat treikam ha ki ar tylli ki shnong, ka Pyndeng Nongbri bad ka Manai.
Ha ka 28 tarik Jymmang la pdiang bad pynskhem ïa ki khlieh nongkitkam ha Pyndeng Nongbri bad ha ka 10 tarik Jylliew pat la pdiang bad pynskhem ïa ki khlieh nongkitkam ha Manai. Na ka shnat Pyndeng Nongbri, la jied ïa u Bah Marbelstar Warjri kum u Khliehduh (President) bad Bah Pynshailang Warjri kum u Saiñpyniar (Secretary); ki symbud khliehduh ki long u Bah Boksing Warjri bad Bah Tairos Warjri, u Symbud Saiñpyniar la jied ia u Bah Burnet Warjri.
Kiwei kiwei ki nongkitkam ki long ka Kong Martidoris Warjri (Finance Secretary), Kong Dady Warjri (treasurer), Bah Maktursing Warjri (Publicity Secretary), Bah Davidunderson Warjri (Asst Publicity Secretary) Bah Pailen Warjri bad Bah Wantar Warjri (adviser), ha ryngkat bad arphew ar ngut ki dkhot (Executive Committee). Ha kane ka sngi la pynkup burom ruh ïa khyndai ngut ki samla ki ba ïoh ka namjop banyngkong ha ka SSLC bad HSSLC (Examination) 2021.
Ha ka 10 tarik Jylliew, 2022 la pdiang bad pynskhem ïa ki nongkitkam jong ka shnat Manai bad la jied ïa u Bah Korman Warjri kum u Khliehduh (President) bad Bah Ribesstar Warjri kum u Saiñpyniar (Secretary); u symbud khliehduh u long u Bah Phlarsing Warjri, u Symbud Saiñpyniar la jied ia u Bah Habanjop Warjri. Kiwei kiwei ki nongkitkam ki long ka Kong Mobina Warjri (Finance Secretary), Kong Bitaris Warjri (treasurer), Bah Koting Warjri bad Bah Phesting Warjri (advisers) Bah Bankitbok Warjri bad Bah Khraw Warjri (auditors) kynthup bad arphew san ngut kiwei pat ki dkhot (Executive Committee). Ha kane ka sngi la pynkup burom ïa ki riewtymmen longkmie bad longkñi jong ka kur Warjri na Manai bad la sam ruh da ki jingai sngewbha na ka seng kur shnat Manai.
Ha baroh ar kitei ki dorbar kur shnat la kren kyntu kynpham da ki rangbahkur naduh u Bah George Warjri (Acting President), Bah Kyrsoibor Warjri (Vice President), Bah Barkos Warjri, Bah Sunshine Warjri (General Secretary) bad kiwei kiwei ki rangbah na la ki shnat treikam jong ka shnong Pyndeng Nongbri bad Manai. Ha baroh ar tylli ki shnong la kren pynkut da ki khliehduh nongïalam Bah Marbelstar Warjri ha Pyndeng Nongbri bad Bah Korman Warjri ha Manai ba la bud artad da ka jingrwai paidbah halor ka Seng Kur Warjri ba la lam da u Bah Sunshine Warjri, Saiñpyniar na ka sengkmie.
