Shillong, ïaïong, 08: Ka Seng Khasi Kmie mynta ka kynti ka la pynkhreh bha nadong shadong ban pynlong ïa ka Shad Suk Mynsiem jong une u snem 2022 ha ka rukom kaba ishongkun ka ban sdang naduh ka 9 tarik haduh ka 11 tarik mynta u bnai Ïaiong, 2022 ha madan Weiking, Jaïaw. Kane kan dei ka sien kaba 111 snem ba la pynlong ïa kane ka jingshad naduh ba la shad nyngkong eh ha u bnai Ïaiong, 1911 ha madan Weiking. Jaïaw.“Ki nongïalam jong ka Seng Khasi Kmie ha ka jingïakren bad ki lad pathai khubor ki la ïathuh ba kane ka Shad Suk Mynsiem kan sa kham iphuh iphieng hadien ka jingshah pynthud ha ka khlam COVID-19 ha u snem 2020 bad ha u snem 2021.“U Chairman jong ka Publicity Committee u Bah Banteilang Rummnong u la ïathuh ba mynta u snem la khmihlynti ba ka jingpoi jong ki nongshad kan long da ki phew hajar ngut na kylleng ka Bri u Hynniewtrep.“U Vice President ka Seng Khasi Kmie u Bah Arwan Tariang u la ïathuh ba ka Seng Khasi Kmie ka la pynlong ïa kane Shad Suk Mynsiem da kaba rakhe ruh ïa ka jingdap 75 snem ka jingïoh laitluid jong ka ri India bad ka jingdap 50 snem ka jingïoh jylla bapura jong ka Jylla Meghalaya.“Ki bor pynïaid jong ka Seng Khasi Kmie ki la pyntip ruh ba ki la khot sngewbha ïa u Lat ka Jylla u Satya Pal Malik, u Myntri Rangbah ka Jylla u Conrad Sangma bad ïa ki Myntri Sorkar, ïa u Chief Justice ka High Court bad kiwei kiwei de ki kynrem ki lyndan ban sakhi lang ïa kane ka Shad Suk Mynsiem kaba ju long shisien shisnem jong ka jaidbynriew Khasi.
