Shillong, Nohprah, 06: Ka Khasi Hills Autonomous District Council (KHADC) lyngba ka Executive Committee ka la pynkhreh ban pynbna noh ïa ka elekshon jied Syiem ba pura hapoh ka Hima Mylliem ha kaba ïa kane ka kam la buh thong ban pyndep la kumno kumno hapoh u Kyllalyngkot, 2023 katkum ka Act and ka Rules jong ka Hima Mylliem.
U Executive Member incharge Elaka u Bah Jambor War ha ka jingïakren bad ki lad pathai khubor ha ka Lah Sngi U Blei u la ong, “ka daw ba kongsan ba ka Executive Committee lyngba ka tnat Elaka ka la shim ïa ka rai ban pynlong noh ïa ka elekshon ka long hadien ba u Pa’iem Latho Manik Syiem uba la shah pynsangeh kam shipor na ki daw ki jingshah ujor bad ka jingdon hapdeng ki jingshah tohkit halor ki jingshah kynnoh u la iehnoh na ka khet kum u Syiem ba pura jong ka Hima Mylliem.”
U la phah ïa ka shithi iehnoh kam naduh ka 10 tarik, Naiwieng, 2022 bad aidaw ba u la don ha ka rta kaba la noh, nangta ba um shym don shuh ha ka met kaba Koit ka Khiah. “Kumta ka Executive Committee kam don lad shuh da kumwei pat hynrei tang ban shu pdiang beit ïa ka jingieh noh kam jong u Pa’iem Latho,” ong u Bah War bad bynrap, “hadien ba ngi la pdiang ïa ka shithi iehnohkam lyngba ka tnat Elaka bad kaba sah mynta ka long ba hap ban pyndap ïa ka kam ba thylli.”
“Ka EC lyngba ka tnat ka la dep pynmih ruh ïa ka jingpynbna ne Notification kaba la don mynta hapoh ophis Hima Mylliem bad ban pynïaid shaphrang ïa ka jingjied Syiem ba pura bad mynta la aiti ha u Returning Officer ban pan ïa ka thup jong ki nongthep vote (Voter list) bad ban leh ïa ka jingïakam bad bad ka jingpyrshah (Claims and Objection),” ong u Bah Jambor.
Haba kylli la ka donkam neem ïa u Acting Syiem ka Hima Mylliem u Paiem Ainam Manik Syiem ban hap iehnoh kam lada u kwah ban ïakhun shwa ka ilekshon jied Syiem, u Bah War u la ïathuh, katkum ka Hima Mylliem Act kam shym la don ka kyndon kaba ong ne kdew ba u Acting Syiem u hap ban hiar shwa na ka khet lada u kwah ïakhun ïa ka Elekshon jied Syiem ha shwa ka ilekshon bad u lah ban ïakhun beit ïa ka ilekshon.
“Kumba ka long mynta ka jingpynkhreh ïa ka ilekshon ka la ïaid shakhmat,” u la ong.
Ha kaba ïadei bad ka jingtohkit haba ïadei bad ki jingkynnoh pyrshah u Paiem Latho Manik Syiem kaba la wan ka hukum napoh ka Ïingkashari Meghalaya High Court ba ka Council ka dei ban pyndep noh ïa kane ka kam hapoh lai bnai, u Bah War u la ong, “ha kaba ïadei bad ka hukum jong ka iingbishar un sa khot ïa ki Legal Adviser ka Council ban ïasyllok ha kaba ïadei bad kane ka kam bad kumjuh haba ïadei bad ka jingphah hiar khet ïa u Acting Syiem ka Hima Mylliem u Paiem Ainam Manik Syiem namarba u dei u pyrsa trai jong u Paiem Latho katba ka jingtohkit ka dang ïaid.”
