Nongstoiñ, Nohprah 01: Ka synjuk ki nongbylla sngi ha baroh ki tnad treikam jong ka sorkar hapoh ka jylla kaba la tip kum ka Joint Action Committee Musteroll Workers Union, mynta ka lah sngi u Blei ka 1 tarik Nohprah ka la pynlong ïa ka jingïakynduh lang ha Nongstoiñ, na ka bynta ban ïatai halor kiba bun ki jingeh ba ki nongtrei bylla musteroll ki ïakynduh.
Ïa katei ka jingïalang la pynlong ha MECOFED Hall New Nongstoiñ, ha kaba la pynïaid da u bah Hubert Kharbani president ka synjuk. Ha katei ka sngi ki nongtrei musteroll ha ki ophis sorkar na kylleng ki jaka ryngkat bad ki nongïalam jong ka All Jaiñtia Hills Musteroll Workers Union ki la ïapoi ha ka jingïalang.
La ïatai halor kiba bun ki jingeh ba ki musteroll ki ïakynduh ha kaba ka kong D.Ïakai ka la pynshai. Ha kaba ïadei bad ki mat jingdawa ba ka synjuk ka la phah sha ka sorkar naduh ki snem ba mynshuwa hynrei ka sorkar kam shym pat la pynurlong ïa kitei ki jingdawa.
U bah N.K.Lanong Secretary ka JAC haba ai jingkren, u la ong ba naduh ba la thaw ïa katei ka synjuk, na ka por sha ka por ki nongïalam ki la leit ban ïakren bad ka sorkar bad ban pynkynmaw ba ka dei ban pyntreikam noh ïa ki mat jingdawa jong ka synjuk. Don napdeng ki mat jingdawa ba ka sorkar ka la pynïoh bad kiba kham bun na ki mat jingdawa ki dang sah teng haduh mynta.
Ka kong D.Ïakai haba ïakren bad ki lad pathai khubor hadien ba la wai ka jingïalang, ka la ong ba ka jingïalang kaba la pynlong ha katei ka sngi ka dei tang ka jingsdang. Ka la ong ruh ba ka synjuk ka hap ban leit pynshai shuwa ha baroh ki district hapoh ka jylla. Ynda la dep lut ka synjuk kan sa khot da ka jingïalang kaba heh bad yn sa shim lang ïa ka rai kumno kin leh lada ka sorkar ka dang sngap mynthi ïa ki jingdawa jong ka synjuk.
