Shillong, Risaw 18: Ka tnat Sociology, ka Captain Williamson Sangma State University, Balalgre, Tura, kan pynlong ïa ka jingïalang ne Symposium kaba shi sngi halor ka phang “Indigenous Knowledge Systems (IKS): Sustainable Future,” ha ka 22 tarik mynta u bnai.
Kum shi bynta jong ka jingangnud ka University haba ïadei bad ki kam wadbniah bad ka jingïakren halor ki jingtip shaphang ki trai ri trai muluk, ka kolshor bad ki kam pynroi kiba neh, kane ka symposium ka thmu ruh ban wanrah lang ïa baroh ki riew shemphang, ki nongwad bniah, bad kiba dang shah hikai ban pynïar ki jingtip ïa ki riti dustur kiba long kiba donkam ha kane ka por kaba mynta.
Ïa ka prokram sdang kan long ha ka por 10:00 baje mynstep ha jaka ka University bad ka Hema Nayak, IAS, Deputy Commissioner, South West Garo Hills, kan long ka kongsan. Yn ïoh ruh ïa ki kyntien lamphang ban sam da u Prof. Bodhi Sainkupar Rani, Associate Professor and Chairperson, Centre for Social Justice and Governance, School of Social Work, Tata Institute of Social Sciences, Mumbai.
Ïa ka prokram yn pynkut ha ka por 3:00 baje janmiet, ha kaba u Dr. Vasanthi Vijaykumar, Vice Chancellor, Captain Williamson Sangma State University, un long u kongsan.
